WILLEMSTAD.- Korte di promé instansia ayera a trata kasonan di mula. Pòstmentu di pakete ku droga ketu bai ta keda bin dilanti den sala di korte. Den e kaso aki e hòmber Jurandy D. (47) ta keda akusá di a trata na pòst un pakete ku tabata kontené 7 kilo di kokaina dia 30 di òktober 2023.
Jurandy ku ta enkarselá, a presentá ayera den sala di korte, pa responsabilisá su mes pa su akto.
Riba e dia ei e personal di duana a hasi un kontròl riba e kahanan ku mester a keda eksportá pa eksterior. Durante kontrol, e personal a deskubrí e kaha ku tabata demasiado pisá. Esei a pone ku nan a kontrolá e kaha i a haña un “dekbed” i tambe algun spèl den e kaha.
Polis a kontrolá e “dekbed” i a haña e kantidat di droga ku a resultá di tabata kontené kokaina den dje. Polis a detené e akusado komo esun ku a manda e kaha i tambe esun ku lo mester a bai tuma e kaha na Hulanda. Na polis i ayera den sala di korte, e akusado a deklará ku ta un fabor el a bai hasi un primu di dje. E primu a bis’é ku e tin ku manda kos pa su yu i dor ku e no tin sédula i tampoko pasport, el a pidié pa hasié e fabor. Segun e akusado e primu despues a muri na fin di novèmber i esei a pone ku e no a bai ni Hulanda mas pa tuma e kaha pe.
El a bisa ku e sa ku su primu ta den droga, pero nunka a pensa ku e lo a hasi un kos asina kuné. Dor ku el a bisa ku ta pa su yu, el a bai di akuerdo pa hasié e fabor. Segun e akusado, e primu a laga un haitiano bin trese e kahanan pe den un pikòp. E kahanan tabata kompletamente na tape será kual e no a haña chèns di wak den nan. E primu a manda un lista di lokual ku tabatin den e kaha i basa riba e lista el a konfia ku ta eseinan tabatin den e kaha sin sa di e droga.
Wes na su turno a bai buska riba Extra su página di morto riba e sistema digital i a mira ku e primu ku e akusado a bisa di ta esun ku a dun’é e pakete, a mira ku e defuntu no tin yu manera el a bisa e akusado. Esei tabata e motibu ku wes a bisa ku e ta keda straño ku e ta e hamber a pidié pa pòst pakete pa su yu.
Riba esaki, e akusado a duna di konos’é, dor ku e sa ku e hòmber ta manda kos pa su yunan tur fin di aña, el a hasié e fabor.
Fiskal ta haña ku e akusashon por keda probá i ta hasi demanda di 30 luna pa e akusado. Fiskal a bisa ku tur hende sa ku droga ta keda eksportá via pakete i mester tabata mas kouteloso, mas ainda si e mes a bisa ku e primu aki tabata den droga.
Despues di a bai deliberá, wes a bisa ku bèrdat no por proba ku e akusado tabata sa di e droga, pero si e ta poné responsabel pa hasi fabor i pòst pakete, apesar ku e mes a bisa ku su tio tabata “deal” den droga. Wes a bisa ku e ta redusí e kastigu un tiki, pa motibu ku e akusado a koperá ku hustisia i ta konsider’é komo “first offender”, apesar ku den pasado el a kai será na Hulanda.
Korte a konsiderá esaki komo kastigu bieu debí ku hopi tempu a pasa.
Na final wes a redusí e demanda i a yega na un kastigu di 28 luna kitando e aresto preventivo.
