WILLEMSTAD.- E akusado J.J. (34) mester a presentá huntu ku su ko akusado J. G. pa vários echonan kastigabel.
J.J. ta keda akusá pa intento di asesinato, maltrato severo dia 28 di novèmber i poseshon di arma mas munishon.
Segun e akusashon, e akusado lo a tira dirigí vários bia riba e víktima di fam Da C.
Pa loke ta trata e di dos akusashon, Ministerio Públiko ta akus’é pa poseshon di arma di kandela, den e periodo di 28 di novèmber 2020 te ku 21 di desèmber 2020.
J.G. ta keda akusá tambe di tabata den poseshon di mas o ménos 445 gram di mariwana dia 21 di desèmber 2020.
Segun deklarashon di J.J. Da C. tin problema kasi ku tur hende den bisindario, pa motibu di su kachónan.
El a splika ku su kachónan kada bes ta kibra kos na outo di hende.
Riba e dia en kuestion, el a lanta i mira ku Da C. su kachó a kibra algu na su outo i esei a pone ku el a bai su kas, pa reklam’é.
A surgi un diskushon entre nan i el a bisa ku Da C. a menas’é.
Despues J.G. a presentá i Da C. a bisé, ku e lo duna su skuter komo bòrg, pa e loke nan su kachó a kibra na su outo. Segun J.J. niun momento so el a saka arma te pe tira.
El a ninga ku el a tira riba Da C. redondamente.
Polis ku a presentá na e sitio, a skibi den un prosèsverbal, ku nan a haña un huls bentá abou den e kurá i tambe un buraku di bala na kurpa di e kas.
Pa aklará tur kos, hues a skucha e víktima Da C. durante tratamentu di e kaso.
Da C. a splika ku bèrdat su kachó a kibra algu na outo di J.J.
E dia ei, el a lanta mainta i topa J.J. den su kurá.
A surgi un diskushon entre nan i J.J. a saka un arma i tira.
Despues J.G. a presentá ku un pipa den su man i a bisa J.J. “tir’é sua tir’é”.
J.G. despues a kue su skuter i bai kuné.
Segun e víktima, niun momento so el a bisa nan ku e ta duna su skuter komo bòrg.
Ta polis a drenta nan kurá i kue su skuter pe.
Mas aleu, e víktima a bisa ku un par di dia promé nan a menas’é i tira riba dje kaba.
Segun e víktima, e ta biba den un situashon di miedu, pa motibu ku nan ta biba banda di dje.
Despues ku nan a sali liber, e hòmbernan a menas’é 3 bia. Tur e bia nan ei, el a bai hasi denunsia na polis.
Segun e víktima ámbos ta su primunan.
J.G. ta para riba ku ta Da C. mes a dun’e e skuter i ku no a menas’é.
Pa loke ta trata e akusashon di poseshon di e 445 gram di mariwana ku a haña na su kas, J.G. a bisa ta trata di yerba bieu ku e tabata traha zeta di dje pa doló i su señora tambe tabata us’é pa doló di menstruashon.
Fiskal den su rekisitorio, a bisa ku e pregunta den e kaso aki ta si bèrdat J.J. a tira riba Da C.
Tambe e pregunta ta keda si J.G. a menasá Da C. i a kue su skuter komo bòrg, pa e daño di outo ku su kachó a kousa. Tambe si bèrdat el a bisa J.J. pa tira Da C.
Segun fiskal, e problema ta ku e personanan aki ta biba den konflikto ku otro.
Ora polis a yega na e kas di e víktima, nan a haña un perforashon di bala.
Esei ta nifiká ku lòsmentu di bala ta ser konfirmá pa e polisnan tékniko.
Segun fiskal, esaki no ta un invento di polis.
J.J. tabatin un problema den pasado kaba ku hustisia pa arma di kandela.
Mirando tur esakinan, fiskal ta haña e akusashon kompletamente probá i ta hasi demanda di 210 dia di kastigu, kual 200 kondishonal pa G. mas 240 ora di trabou pa komunidat.
Pa loke ta trata J.J, fiskal ta haña e akusashon probá i ta hasi demanda di 36 luna di kual 12 kondishonal, mas 3 aña di prueba i tambe guia di FMA.
Hues a bisa ku e lo tuma desishon dia 19 di yüli próksimo.