WILLEMSTAD.- Kuerpo Polisial a tuma nota ku durante di último simannan atrako a lanta kabes.

Despues di ‘lockdown’ por a premirá ku aktividatnan kriminal lo oumentá. Durante di último simannan, esaki a konsentrá prinsipalmente riba atrakonan den bibienda. Algun di e atrakonan aki tabata dirigí riba komersiantenan, unda e sospechosonan a bai ku basta plaka kèsh i otro pertenensianan di balor di e abitantenan.

Den transkurso di dianan ku ta sigui, polis lo bolbe bai duna rekomendashonnan, kon ta e mihó manera pa siudadanonan protehá nan mes mas tantu posibel kontra di atrakadónan. Polis ke pidi komunidat kompletu pa mas tantu posibel sigui e tepnan balioso aki i asina hasi e atrako ménos atraktivo pa e malechornan.

Kuerpo Polisial tin un ròl importante di informá komunidat di e imágen kriminal a base di análisis ku ta keda hasí i di duna rekomendashon. Tambe polis ta aktua di forma preventivo manera e.o. oumentá visibilidat, tene kontrol ets i asina evitá ku atrako ta tuma lugá. Pero nos lo tin éksito di tene e kantidat di kasonan di atrako abou, solamente si kada persona individualmente pero tambe kolektivamente, yuda su mes dor di tuma e medidanan di prekoushon apropiá, pa minimalisá e rísiko di bira víktima.