WILLEMSTAD.- Prezunan den Sentro di Detenshon i Korekshon Kòrsou no ta keda ketu mas. Nan ta protesta kontra di e situashon a-higiéniko, violashon kontra di derechinan humano i un situashon ku nan ta konsiderá komo inhumano pa nan por keda den dje.

Ayera pa medio di abogado a keda entregá e petishon pa e huisio sumario.

E petishon firma pa e prezunan ta bisa entre otro ku ta pa hopi aña kaba ku SDKK ta violá di forma flagrante derechinan humano en general. Nan a referí na e European Commitee For the Prevention òf Tortura (CPT) ku a bishita prizòn na 1994 a kalifik’é komo un trato inhumano i bou di nivel. Na 2007 e mesun CPT a bishita Kòrsou i atrobe a konstatá violashonnan grave di tratado di Oropa refiriendo na un situashon inhumano i nan a hasi algun rekomendashon na outoridatnan di Kòrsou.

Den e petishon pa e huisio sumario, e abogado ta menshoná ku tin no ménos ku 5 biaha rapòrt kritiko riba e situashon den prizòn.

Na 2014 Raad voor de Rechtshandhaving a investigá e kalidat i seguridat di e detenidonan i di e personal den SKK. E raad a konkluí durante di su investigashon di inspekshon entre otro ku e infrastruktura sanitario a hopi malu. Tambe e raad a bisa ku no ta korekto for di e punto di bista humanitario pa laga e detenidonan hopi largu den sèn kaminda e sanitario ta defekto.

Na e momentu aki tin plaga di muskita i sangura. Esaki komo konsekuensia ku SDKK tin problema di riol. Henter dia tin un holó insoportabel i nan tin problema ku insekto manera kakalaka, raton, djaka etc., etc. Konstantemente nan ta keda piká.

Pa loke ta e situashon sanitario parse ku asta ora flùsh e wc den sèl, e sushi ta bin ariba i kore den sèl di e detenidonan.

E petishon di huisio sumario ta referí mas aleu di tratado internashonal di derechi humano ku ta keda violá. CPT tin stándarnan ku nan ta mustra ariba. Nan ta referí na stándarnan di grandura di sel, iluminashon, higiena i alimentashon, programa di dia, kontakto ku kuido médiko i ku e mundu eifó i kuido di e prezunan kontra maltrato. Mirando e defisiensia severo den e infrastruktura sanitario i e problemátika di riol ku tin por konkluí ku SDKK no ta kumpli ku e stándarnan ku CPT tin pone.

E prezunan ta hasi apelashon riba artíkulo 3 EVRM kual ta prohibí tortura, kosnan inhumano i maltrato den nan kastigunan.

Mas aleu nan ta protestá kontra kuminda. Segun e petishon pa huisio sumario SDKK tin un falta enorme di kuminda. Siman pasá no tabatin sufisiente kuminda pa e detenidonan. Dia 12 di desèmber nan a haña desayuno te banda di 11 or di mainta, esaki a konsekuensia di falta di kuminda. Ora nan a kaba di kome anochi nan a nenga di bai den nan sèl. E situashon a bira unu kaótiko i eksplosivo. E wardadónan di prezu a usa gas lakrimógeno pa por a manda nan bèk den nan sèl. Tambe nan ta reklamá e falta di remedi i un kuido médiko malu. No tin dietista miéntras nan tin derechi riba esei.

Ku tur e puntonan ariba menshoná e detenidonan pa medio di nan abogado a entregá ayera un petishon pa huisio sumario. E abogado a pidi korte pa ordená gobièrnu pa den 2 biaha 24 ora solushoná e situashon di riolering, sòru pa kuminda na tempu i kumpli ku derechinan humano.