WILLEMSTAD.- E ‘black out’nan ku a surgi ta algu ku a hasi impakto riba e pueblo aki, tabata tópiko di kòmbersashon tur kaminda. I asta representantenan di pueblo den Parlamento a ser aserká dor di hendenan den komunidat pa motibu ku di un òf otro forma nan bida a ser impaktá. Tin hopi hende ku no por a hasi nan trabou pa motibu ku no tabatin koriente. Tin otronan ku a sufri dòbel, pa motibu ku nan awa tambe a kai afó dado momentu. Ta kasnan ku ta dependé di pòmpnan ku tin di pòmp manda awa pa nan. Tin otronan ku a pèrdè aparatonan elektro-doméstiko. Pero ta konosí tambe ku esnan ku ‘claim’ e daño tin di kana un kaminda di krus pa haña kompensashon pa e daño ku nan a sufri. Esei di akuerdo ku parlamentario sra. Gisette Seferina di frakshon di PAR durante e reunion di komishon sentral riba e tópiko di ‘black out’.

Sra. Seferina durante su intervenshon a probechá dje okashon pa hasi pregunta pa haña aklarashon despues riba orígen i konsekuensianan di e ‘black out’nan. El a puntra por ehèmpel si e sistema di produkshon i suministro di awa i koriente na Aqualectra no a kambia. Si último añanan e maneho no a kambia, anto kiko si ta loke a kambia ku a surgi problema den e último dos lunanan ku a surgi tantu interupshon di koriente?

Lo por tin komprenshon pa e splikashon di direktor sr. Darick Jonis, esta ku e sistema ta hopi sensitivo etc. i ku e ta deskonektá pa evitá un problema. Pues den e kaso aki e lo puntra kasi meskos. Ta kiko a pasa ku awor direpente e sistema ta ‘trip’?

Segun sra. Seferina, ta mundialmente konosí ku tin hendenan ku mente maligno ku por drenta den sistemanan digital i afektá e operashon. Tabata algun tempu pasá ku por a tende kon a sekuestrá sistemanan di seguridat di paisnan afó, pero ku tambe el a ser hasí aki na Kòrsou i Aruba. Su pregunta ta: A tene kuenta ku e problema aki lo por ta unu di seguridat digital i no unu tékniko mekániko? Por garantisá pueblo ku no ta esaki ta e kaso? Loke sra. Seferina kier a puntra ta mas bien, si no ta ekskluí ku lo por ta un atake sibernétiko (cyber attack).

E problema ta unu ku a base di nos kapasidat lokal lo por ser solushoná aki mes, òf no tin di aber ku algu ku ta krusa frontera?

Loke por nota último tempu tambe ta ku nos pueblo tin difikultat den komunikashon pa solushoná problemanan ku tin di aber ku Aqualectra. E no ta duda ku e personal ta traha ku alma i kurpa tur dia, pero tòg tin algu ku no ta sosodiendo pa e pueblo, spesialmente pa hende grandinan. E grupo aki ta di hendenan ku ta konfia ku ta via di telefòn nan tin di haña solushon. E problema ta ku hopi biaha no ta haña hende na telefòn, òf te na ora ku haña unu mes e no ta esun apropiá pa yuda bo pa por yega na solushon. Un ehèmpel simpel ta diskrepansia den kuentanan ku ta yega kas pa paga. E ta kere ku mester buska un sistema mas efektivo pa atendé ku e konsumidó.