Kompartiendo apartamentu ku otro:

WILLEMSTAD. - Korte Penal di Rotterdam tin nan man yen ku kasonan kaminda ku yu nan di Kòrsou ku ta hasi nan mes kulpabel na aktonan kastigabel. Siman pasá Korte Penal a dikta sentensiá den un kaso kaminda ku dos persona ta biba den un apartamentu i kos no a kana bon entre di e dos personanan aki, kaminda ku e yu di Kòrsou a disidí di buska yudansa di su ruman i un amigu ku a bai regla e asuntu ku bashamentu di  bala.

E dos personanan aki ta kompartí un apartamentu ku otro. Kada un tin nan kamber, pero e yu di Kòrsou no por a soportá e bochincha di esun ku ta kompartí e apartamentu kuné.

Riba e dia en kuestion, e zonido a bira di mas pa e yu di Kòrsou ku a bai buska su ruman i un amigu i ora ku nan a regresá, e akusado yu di Kòrsou a bai na porta di kamber di e kompañero i a kuminsá bati esaki skòp i moketa i tambe un palu di basora ku e tabatin den su man.

Ora ku e ruman i amigu a kita e akusado for di e porta, e persona a habri i akinan e amigu ku tabatin un arma di kandela den su man pa un motibu òf otro a haña e nesesidat pa lòs un tiru dirigí riba e persona i afortunadamente e bala no a alkans’é.

Akinan e akusado a kita e arma for di man di su amigu i a dirigí esaki kla pa los un tiru riba persona, pero ruman di e akusado a bula dilanti e persona, loke ku a pone ku e akusado no a tira mas.

Pero e atake a kontinuá ku maltrato severo riba e persona.

Esaki a trese kuné e akusashon di intento di asesinato riba e kompañero di bibienda, pero fiskal mes a pidi pa apsolvé e akusashon aki, pa motibu ku investigashon i testimonio ta indiká ku e akusado no a tira, pero e ko-akusado (amigu) si a tira.

Esaki a pone ku e akusashon a bira intento di maltrato i asesinato.

Investigashon di Reclassering ta konkluí ku e akusado no por kontrolá su mes, ora ku e konfrontá situashonnan similar, esta ku e ta bira agresivo i ta pèrdè tur sentido di rasonabel i ya no ta mira kon ta solushoná e problema sin violensia.

Esaki ta pone ku Reclassering ta rekomendá pa e akusado haña tratamentu síkiko i si ta nesesario asta remedi e lo mester haña.

Esaki ta trese korte na e desishon di 20 luna kastigu di prizòn di kua 5 luna kondishonal i dos aña di prueba.

Komo kondishon adishonal e tin di sigui tratamentu na un instituto sikiátriko bou di guia di Reclassering te ora ku Reclassering ripará ku e ta bon pa kontinuá den komunidat.