WILLEMSTAD.- E problema ku a surgi entre dos bisiña na fin di luna pasá entretantu a keda solushoná. Bisiñanan ku intervenshon i mediashon di tersera a yega na un entendimentu riba henter e problema di molèster di kachó(nan) lo tabata kousa na un kas den e bario di Cas Grandi.

T’asina ku for di ayera mèrdia por a nota un post atrobe di e famia doño di e kachó ku a keda konfiská, aunke e biaha aki den un ambiente mas alegre. Pero esei ta pa motibu ku nan famia awor ta kompleto atrobe.

EXTRA por a komprondé ku ayera mainta mes tabatin deliberashon ku a tuma lugá na e sitio mes, pues unda e dos kasnan ta, i aki partidonan a yega na sierto entendimentu riba e kondishonnan stipulá pa evitá problema den futuro.

Un dje kondishonnan prinsipal ta ku e kurá dje kas unda e kachó(nan) ta biba lo mester ta di tal manera será ku no tin salida di kachó. Pero nos a komprondé ku esei ta un kondishon ku e famia a kumpli kuné asta promé ku e problemanan a eskalá.

Bou dje entendimentu aki ku a ser poné riba papel dor di Ministerio Públiko partidonan a dera hacha i asina e kachó ku un siman pasá a keda konfiská por a bai bèk kas di famia Victorina.

Manera ta konosí, e kaso aki a kapta basta atenshon, prinsipalmente riba medionan sosial despues ku un agente polisial a disidí di filma henter e esena i pone esaki riba Facebook. Aparte di mester a atendé ku e tristesa di mira nan kachó ser konfiská, e famia mester a mira kon nan privasidat a ser violá dor di esnan ku presisamente mester a garantisá e privasidat ei.

Sin ke bai bèk mas den orígen dje problema, mester bisa ku importante ta ku a yega na un entendimentu.

(Foto File)

https://extra.cw/problema-ku-kacho-den-cas-grandi-ta-solushona/