WILLEMSTAD.- Problemanan di karakter sikológiko ta subiendo, i esei ta un desaroyo preokupante, i e ta un resultado dje situashon di pandemia di COVID-19. Esei di akuerdo ku Minister di Salubridat, Medioambiente i Naturalesa, sra. Zita Jesus-Leito durante e enkuentro ku prensa ku gobièrnu. Segun e minister, e situashon aki ta preokupante i e lo ke mir’é otro.

Segun e mandatario, gobièrnu pa medio di su ministerio ta sigui duna su sosten i kuido kaminda esei ta nesesario. Ta importante pa tin atenshon pa hendenan ku ta bibando nan so. Hopi biaha e hendenan aki, i den e situashon aktual, ta bai sufri di angustia i depreshon. Henter e situashon ku nos ta pasando aden aktualmente ta sòru pa preokupashon serka nan.

Tin hopi hende ku pa motibu di e pandemia a bin pèrdè trabou. I ta bon pa nos hasi uso di e rekurso i fasilidatnan ku tin pa yuda esnan ku tin mester di esei. Den esei por pensa riba entidatnan manera Skuchami, unda por yama, papia i desahogá.

Mas aleu tambe esnan ku ta mira ku den nan sírkulo di famia i konosínan tin hendenan ku mester di atenshon, ta bon pa aserká nan i papia ku nan maske ta na telefòn. E lo sirbi sigur komo un forma di sosten, segun sra. Jesus-Leito. Ta nos tur huntu mester pasa dor di e periodo difísil aki.

Pero e lo bini bèk riba e tema aki, ya ku riba tereno di salú mental a kuminsá mira sierto desaroyonan ku e lo ke mira otro.