Breu den tanki ta propiedat di PDVSA

WILLEMSTAD.-E kompania Asfalt Centrale Curaçao den un informá na su klientenan ta informá ku nan lo no por kumpli ku entrega di asfalt for di 10 di februari proksimo. Di awor aki te proksimo aviso Asfalt Centrale Curaçao no por entrega breu na komunidat.

EXTRA a logra pone man riba un karta ku Curoil a manda pa klientenan den kua ta splika ku na 31 di desèmber 219 e kontrakt di hür entre Refineria di Korsou i Refineria Isla/PDVSA a terminá. RdK ta den e proseso pa haña un operadó nobo, sinembargo e produktonan ku tin tankinan ta propiedat di Refineria Isla/PDVSA.

Curoil ta informá ku nan ta negoshando ku Refineria Isla/PDVSA pa kompra di e sobra Bitumen ku a keda den e tankinan. Nan no a haña kontesta ainda di PDVSA. Komo konsekuensia di esei Curoil ta informá ku miéntras ku nan no logra un akuerdo ku Refineria Isla/PDVSA nan lo no por bende Bitumen.

Sabine Curiel bosero di Curoil un bia mas a enfatisá ku nan ta den pleno negosiashon ku PDVSA i ta spera di yega na un solushon hopi lihé.