Ana Freitas

Integra Natural

Ana Freitas a kuminsá ku un negoshi di produktonan natural/orgániko, un idea ku a bin di su yu muhé despues di un proyekto den fakansi. Integra Natural ta situá den kurason di Skalo, bahando brùg Wilhelmina e bista ta dirèkt  riba Parke Leyba kaminda Integrá Natural ta situá.

Ana Freitas; aki den Skalo nos tin un fábrika di produkto natural. Nos a kuminsá 5 aña pasa ora mi yu Tatiana tabatin e idea magnífiko di traha un produkto pa e haña sèn èkstra den fakansi. Tatiana (e tempu ei 10 aña) a traha un lipbalm di lamungras kual el a bende na skol i riba diferente feria i despues a riba ku tin un oportunidat di negoshi aki. A kuminsá hasi un investigashon kua produkto mas lo por produsí i awe 5 aña despues nos ta akinan.

Promé di a yega asina leu a hasi e investigashon lokal i internashonal, nan a biaha bai konvenshonnan den eksterior pa asina pro a amplia nan konosementu riba e tereno aki.

Kiko ta produsí....

Ana Freitas a splika ku nan ta traha tur loke tin di aber ku kuido di kurpa, for di kabei kara pia, kurpa . Ingredientenan prinsipal ku e produktonan ta kontené na yerbanan lokal, nos mes frutanan, matanan i esun ku no ta krese aki nos ta importá. “Si mi haña un pida pampuna awor aki mi por traha algu di dje”, asina Ana a konta Djasabra. Tur loke tin benefishinan pa bo kueru i kurpa i kabei nan ta inkorporá den e produktonan.

Den kaso di un pampuna esaki ta keda prosesá i pone kla i ora e produkto ta kla ta hink'é den dje pa yega na sea habon i kualke otro produkto di kurpa. Por ehèmpel si ta habon nan ta usa zetanan natural manera oleifi, zonnebloem, koko, almond oil i asina yega na e fórmula.

Lamungras...

Di e yerbanan lokal ku mas Integrá Natural ta usa segun Ana Freitas ta e lamungras. Pero tambe orégano, moringa. Den frutanan ta usa mango ta esun mas usa teniendo na kuenta ku den dje tin ingredientenan ideal pa enrikesé kurpa ei hende. Hopi di e yerbanan Integrá Natural mes ta planta i e frutanan tambe nan a kuminsá pero e ta tuma mas tempu pa krese i duna e fruta deseá.

Nòmber...

Ana Freitas ta splika ku e nòmber nan a yega na dje abase di beibel. Den beibel tin ku Dios ta un eskudo pa hende íntegro i for di einan nan a Sali e nòmber. E fábrika ta na nan tienda mes, produktonan fresku pero tambe ku fecha di vensementu pa asina kumpli ku e stándarnan internashonal. I banda di ta ofresé e produktonan riba merkado lokal., tambe nan a kuminsá eksportá pa Ulanda.

Akohida.....

Ana Freitas ta kontentu kon hendenan lokal pero tambe e forma ku turistanan a reakshoná riba nan produktonan. Nan tin diferente testimonio di hendenan ku difikultat di usa habon na kurpa, pero usa e produktonan ku nan ta ofresé no a haña nada di alergia i niun reakshon. Esei ta duna nan mas satisfakshon pasobra e produktonan no ta pa bunitesa so pero e ta bai muchu mas leu ku esei. Tin hende ku kueru hopi delikado ku no por usa tur tipo di produkto ku tin kímiko den dje. Tin hende no por usa niun produkto ku tin algu di bestia den nan i pa e personanan ei nan tin e produktonan ideal.

Dikon Skalo....

Ana Freitas semper tabata masha namorá ku Skalo. E ta stima Skalo su historia, su edifisionan ta asina bunita i hopi sentral di siudat. Skalo a keda bandoná pa hopi tempu i ora e oportunidat a presentá pa nan habri einan, el a tum’e mesora. I awor aki tin diferente proyekto ta bai rònt den Skalo, proyektonan di arte i un desaroyo inmenso ku ta bai hasi Skalo bek loke e tabata. I p’esei tambe Skalo tabata importante pa nan ta einan ya ku e ta kuadra den loke nan ta presentá, esta algu traha na man, obra di arte.

Turistanan por ehèmpel ta haña akseso hopi fásil na e lokalidat di Integra Natural. Ora nan baha for di barku i kana subi brùg di Skalo esta Wilhelminabrug, ta un kana i yega règt serka e tienda/fábrika di Integra Natural.

Fin di aña...

Den fin di aña aki lo bai tin kosnan diferente. Lo tin produktonan pa limpiesa di kas traha abase natural pero tambe ta den tapara pa traha paketenan pa fin di aña. Paketenan ku por hasi regalo kuné.