WILLEMSTAD.- Produktor Michel Drenthe e siman aki a haña notifikashon ku e lo risibí próksimamente un kontribushon di 950.000 euro (ku ta mas ku 1.7 mion Naf) pa realisashon di e pelíkula ‘E Liña Final’.
E proyekto a keda selektá pa risibí fondonan di realisashon serka ‘Nederland Film Fonds’. Drenthe, den entrevista ku EXTRA, ta bisa ku e ta hopi kontentu ku e fondo. Na mesun momento Drente ta duna konosé ku den e próksimo lunanan lo buska mas sèn pa e proyekto. “Segun nos presupuesto nos mester tin 1.7 mion euro pa henter e proyekto. Nos ta spera ku den e próksimo lunanan nos lo haña garantia pa e sèn.” Segun Drenthe produkshon di e pelíkula ‘E Liña Final’, ku ta basá riba un kuenta kòrtiku di legendario Frank Martinus Arion titulá ‘De Elegante Renners’, ta un proyekto grandi.
“Dia 9 di yanüari 2006 Frank Martinus Arion a duna mi su buki ‘De Eeuwige Hond’. ‘De Elegante Renners’ ta un kuenta den e buki. Mi a bai kas i lesa e kuenta inmediatamente.” Via di e kuenta Drenthe a kuminsá lesa un otro buki ”De Treurige Kampioen” di Jan Brokken. Despues di hopi aña Drenthe a produsí un seri basá riba e buki. Awor ta tempu pa traha e pelíkula ‘E Liña Final’.
Segun Drenthe produkshon di e buki tin un planifikashon basta grandi. “Si tur kos ta bayendo bon e pelíkula lo ta kla den dos aña.”
Segun Drenthe Kòrsou ta konosé hopi buki hopi bon i interesante pa produktor di pelíkula. El a kumpra resientemente derecho riba e buki ‘De Boten van Brakkeput’ van Miep Diekman. Tambe e ta menshoná e buki ‘De duik’ di Sjoerd Kuyper’ ku ta hopi interesante, segun Drenthe. E produkto ta splika ku e tin diferente idea pa proyekto nobo.

Relashoná ku e fondo di ‘Nederlands Film Fonds’ Drenthe ta splika ku for di yanüari 2021 a habri e posibilidat pa sineastanan prosedente di Kòrsou hasi petishon pa fondonan. ‘Caribbean Filmcom’ kende ta un kompania di produkshon di sine i programanan di televishon situá aki na Kòrsou a apliká pa e fondonan. Su petishon pa fondo ta e promé petishon for di Kòrsou ku a keda onrá.
Filmashon di e pelíkula ‘E Liña Final’ lo ta bou di guia di produktor Michel Drenthe di Caribbean Filcom, na enkargo di e script lo ta Hesdy Lonwijk i e senario lo sosodé dor di Roelof Jan Minneboo.