WILLEMSTAD.- Kòrsou ta habri un siman ku un posibel krísis nobo, un krísis di webu. Esaki lo por tin konsekuensia serio pa disponibilidat di webu. Si no bin un solushon rápido pa banda di produkshon lokal di webu, e senario pió lo ta oumento di preis di webu te na 11 florin pa kaha.

E orígen di e problema ta ku webu ta den makutu básiko i preis pa un kaha di dozein di webu ta fl. 4,88. Un preis ku a keda establesé for di 14 aña pasá. Miéntras tantu por imaginá e inflashon atrabes di añanan pero tambe e pandemia mundial di covid ku a afektá transporte mundial i un oumento drástiko den preis ku a influensiá e kadena di suministro inmensamente. Awor a bin aserka e guera na Ukrania ku ta un di e eksportadornan mas grandi na Mundu di grano. Esaki ta kousa un oumento di preis di kuminda galiña.
Tur esaki ku un konsekuensia devastador pa produktornan lokal di webu ku no por oumentá preis di webu pa kontrarestá tur e otro oumentonan menshoná pa motibu ku webu ta den makutu básiko.
Pa e motibu aki produktornan lokal ta den situashon finansiero sumamente difísil i no por kumpli ku vários obligashon. Un di esaki nan ta ku no tin moda pa kumpli ku e eksportador internashonal di kuminda di galiña. E debe a oumentá i bira asina haltu ku ya no tin krédito mas serka e empresa aki. Aktualmente tin 14 kònteiner aki na Kòrsou ku kuminda pa galiña i si pa djárason 12 di mèrdia, produktornan lokal no kumpli ku nan pago, e empresa lo manda tur e kònteiner nan aki bèk Ulanda. Aktualmente produktornan lokal tin 1 siman mas di kuminda pa nan galiñanan. Si no bin un solushon a korto plaso lo por bai kuminsá sinti skarsedat di webu den supermerkadonan i toko nan lokal.

Sin kuminda di galiña produktonan lo bai kumpra aros pa tene nan galiñanan na bida, poniendo ku por bai surgi un skarsedat di aros manera a yega di pasa kaba den pasado.
Tantu Minister Cijntje komo Minister Pietersz-Janga ta na altura di e último desaroyonan aki. Minister Presidente Pisas tambe a keda poné na altura.

Skarsedat di webu lo tin konsekuensianan pa hopi sektor aki na Kòrsou, di e konsumidó na kas, e empresario chikí ku traha por ehèmpel bolo pa bende, sektor turístiko manera hotèlnan i restorantnan. E sla lo ta hopi duru pa Kòrsou.
Aktualmente pueblo di Kòrsou ta usa entre 80 pa 100 mil webu pa dia. Mesora por bisa pa importá webu for di eksterior. Tin dos problema prinsipal ku esaki i unu ta e gastu enorme i di dos e peliger di importá kualke vírus. Aktualmente na Merka mes tin un problema di vírus ku mester a likidá mas ku 36 mion galiña pa kual Merka mes mester pensa pa importá webu. Tur esaki por influensiá preis di webu mundialmente.
Informashon i dokumentonan ku EXTRA ta disponé di dje ta indiká ku si importá un kònteiner di webu ku ta kontené 900 kaha di 360 webu kada unu lo tin un kosto di algu mas ku 100 mil dòler. Ainda mester bin aserka impuesto, kosto di transporte i tambe pèrdida di webu ku por kibra durante transporte. Un kalkulashon a base di e sifranan aki ta pone ku lo mester bende un kaha di dozein di webu pa Fl 11,34 si importá esaki. Un preis apnormal haltu i devastador pa pueblo di Kòrsou.

Tabatin vários reunion ku tur aktor entre otro ku MEO i SER tambe ta sigui e proseso di serka. E bala ta den skochi di Minister Cijntje ku pa medio di un ordenansa ministerial por aprobá un subida di preis ku asina ta duna e produktornan lokal un poko mas espasio pa kumpli ku nan debernan finansiero i asina por sigui abastesé merkado lokal ku webu. Ta na gobièrnu awor pa wak kon ta bai atendé ku e krísis nobo aki ku lo nifiká di tur forma un oumento di preis di webu o sea un skarsedat enorme di webu. EXTRA lo sigui e desaroyonan aki di aserka pa tene nos lektornan na altura.