WILLEMSTAD.-Un bon públiko a asistí na otro charla di Fundashon Prevenshon den kuadro di nan siklo ‘screening’ di poblashon. Prof. Bob Pinedo tabata personalmente na e Sentro di Bario di Groot Kwartier pa tene su charla i despues a kana yega serka di kada un di e personanan ku a hasi pregunta. Hopi pregunta interesante demostrando ku tin un ‘hamber’ pa informashon di e índole aki den nos komunidat. EXTRA tabata presente pa kubri un aktividat asina importante. Direktor di Fundashon Prevenshon sra.Louise Elstak i otro profeshonalnan di e fundashon i tambe Sefba a pèrkurá pa un anochi sumamente interesante.
E ‘screening’ di hende muhé ta importante pa detektá kanser òf mihó bisa pa detektá pre-kanser. Sra.Elstak a splika di e vírus Papiloma ta algu ku por keda transmití via kontakto seksual. Tin 160 tipo di e vírus ei. E por paresé manera un fret na e pénis, anus i otro áreanan. Despues di 10 pa 20 aña e por kousa kanser. Un di e faktornan importante pa tene kuenta kuné ta hendenan ku tin mas ku un pareha. Otro faktor ku ta kousa e problema aki ta humamentu, uso eksesivo di alkohòl i sobrepeso. E tèst ta dura solamente 7 minüt pues niun hende muhé di entre 25 pa 65 aña no tin nodi di tin miedu. Ta hopi rekomendabel pa hasi e tèst. Despues di tres siman por tende e resultado serka dòkter di kas.

Prof. Bob Pinedo e bia aki tambe tabatin palabranan di rekonosementu i gradisimentu na su amigu Lio ‘Paps’ Capriles q.e.p.d. pa su sosten grandi na e fundashon.
Pinedo di forma hopi kla a splika tur esnan presente ku Fundashon Prevenshon no tei solamente pa prevenshon di kanser, pero e fundashon tei pa Salu. El a para ketu pa mustra kua ta e faktornan prinsipal ku ta kousa mas tantu morto. Na promé lugá tin humamentu, sigui pa preshon haltu, kolesteròl haltu, obesidat, poko komementu di fruta i berdura, poko moveshon i uso eksesivo di alkohòl.
Prof. Pinedo a enfatisá ku por sobrebibí kanser, ounke e kalidat di bida ta bai hopi atras p’esei ta importante pa hende kuida i no laga e situashon yega te na ekstremo.
Fundashon Prevenshon ta bai kuminsá ku un tèst nobo, esaki ta e tèst di tripa. Ta kuminsá na wak si e pashènt tin sanger den sushi, i si esei ta e kaso ta laga e pashènt sigui ku tèstnan mas avansá. E tèst aki ta tantu pa hende hòmber komo hende muhé. Sigui e presentashon kompletu di Prof. Pinedo na Groot Kwartier riba www.extra-v2.mystagingwebsite.com i Facebook page di EXTRA Curaçao.