WILLEMSTAD: Entrante 1 mart Profound Projects, un empresa di consultancy i web development ku ta konsistí di un ekipo hóben i altamente motivá, a atkerí e kartera di klientenan di E-sites Caribbean.

Den un tempu relativamente kòrtiku, Profound Projects a krese bira un spesialista den e ramo di consultancy digital i web development na Kòrsou. E kompania ta enfoká prinsipalmente riba proyektonan di consultancy den e ramo di transformashon digital i komo tal web development ku online marketing ta fungi komo e fundeshi di nan servisionan.

E-sites Caribbean ta kai bou di e kompania di software BearingPoint Caribbean. Komo parti di su strategia di kresementu, BearingPoint a tuma e desishon di pone enfoke riba

solushonnan di IT den e merkado di asuntunan fiskal, seguridat sosial i pèrmit. Nan a logra hasi esaki riba eskala global, spesífikamente den paisnan chikí, e asina yamá Estadonan Insular Chikí den Desaroyo (Small Island Developing States òf SIDS). Aktualmente, BearingPoint ta hasiendo negoshi den mas ku 10 país SIDS den, entre otro, region Karibe i Pasífiko Sur. E pronóstiko ta ku nan lo krese mas ainda den e próksimo añanan. Pa e motibu aki BearingPoint a disidí di entrega e servisionan i aktividatnan di E-sites Caribbean na un sosio stratégiko nobo ku un posishon sólido riba merkado komo empresa digital.

E-sites Caribbean ta aktivo na Kòrsou ya for di aña 2012 i for di e fecha di su inisio e la bira un influensia klave den e desaroyo i solushonnan di retonan difísil riba tereno digital. Den transkurso di tempu e kompania a duna aporte na strategianan digital, wèpsaitnan, online marketing i appnan di mas ku 50 kliente den Antia Hulandes i Surnam. For di 2016 e ta forma parti di Bearingpoint Group.

Pues e atkisishon tabata un paso positivo tantu pa Profound Projects komo E-sites Caribbean. "Den nos búskeda pa un sosio komersial adekuá, nos tabata buska un sosio ku lo sigui presta e servisio ku nos tabata duna. Esei ta sumamente importante. Pa nos e sosio mester ta no solamente un kompania fuerte riba tereno digital, sino tambe un kompania ku eksperensia, ku ta profeshonal i ku tin wowo pa kliente. Despues di hopi deliberashon nos a tuma un desishon informá i nos tin konfiansa ku Profound Projects lo sigui ofresé e servisio aki i ku e lo garantisá e mesun kalidat i kontinuidat", asina a deklará Avinash Grootens, Direktor Ehekutivo di Bearing Point.

Profound Projects ya tin algun tempu ta hasi esfuerso pa ofresé su servisionan riba merkado internashonal. Asina e la bin ta kolaborá frekuentemente ku Ngrane, nan sosio stratégiko na Hulanda ku ta spesialisá den e ramo di User Interface (UI) i Web Design. "Awor ku nos a atkerí e kartera di E-sites Caribbean, nos a drenta e merkado di Aruba, Sint Maarten i Surnam. Awor nos por yuda e empresanan i agensianan di sosten di mas renombrá riba e merkadonan aki pa nan logra nan ophetivonan digital", asina a deklará Boudino de Jong, Direktor Ehekutivo di Profound Projects.

Gino Jacobs, Direktor Ehekutivo di Profound Projects, ta añadí: "Den e atkisishon aki tur partido ta sali ganá. Awor ku nos a ekspandé e alkanse di nos organisashon, nos por ofresé klientenan un mihó asistensia i brinda nan un konosementu spesialisá i dediká. Tambe nos ta konsiderá nos mes fortuná di ta den serkania di e éksitonan di Bearingpoint, espesialmente mirando e echo ku nos a kaba di drenta e ámbito internashonal i nan a logra hopi riba e tereno aki. Alabes esaki ta brinda nos oportunidatnan nobo pa bira mas internashonal mediante nos kooperashon stratégiko ku nan i asina tantu Bearingpoint komo Profound Projects ta duna aporte na e ekspanshon stratégiko di e servisionan di eksportashon di Kòrsou".