WILLEMSTAD.- Durante konferensia di prensa di gobièrnu di Kòrsou ministernan Steven Martina (Desaroyo Ekonómiko) i Quincy Girigorie (Hustisia) djamars último a presentá e programa “At Home in Curaçao: convenient working and living”.
E programa ta un konsepto ku ta habri oportunidatnan nobo pa Kòrsou por risibí otro tipo di bishitantenan profeshonal, ku tin kapital i ku tin un espíritu empresarial haltu. Realisashon di e programa ta un kolaborashon estrecho entre e Ministerio di Desaroyo Ekonómiko (MEO) i Ministerio di Hustisia. E departamento di Koperashon Ekonómiko pa Eksterior na MEO huntu ku Servisio di Atmishon (Imigrashon na Ministerio di Hustisia) a traha huntu pa duna realse na e programa akí. Komo partnernan gubernamental, Ministerio di Desaroyo Sosial, Labor i Bienestar (SOAW) i Ministerio di Finansa tambe a duna sosten na e programa akí. Pero tambe a traha huntu ku partnernan semi privá manera Curaçao Tourist Board (CTB), CAAG Software i Grant Thornton.
Segun Ministerio di Desaroyo Ekonómiko: “Sin nan aporte i koperashon e programa akí no por a keda realisá.” A lansa e programa di forma internashonal via di un konferensia virtual: “Adapting Tourist Destinations For Remote Workers & Digital Nomads in 2021” i via ofisinanan di merkadeo internashonal di CTB.
Pa mas informashon tokante e programa akí òf pa por apliká pa un pèrmit pa sea komo ‘remote worker’, un persona ku ke pasa wenter òf komo invershonista, por bishitá e wèpsait www.athomeincuracao.com i aki riba por yena e aplikashon di forma digital. E wèpsait ta na hulandes, ingles i spañó ya por akapará bishitante for di vários partinan di mundu.