Sady Elhage (konsulado Merikano)

Junaiska Geferts (Alumni YLAI)

Eric Elliott (Public Affairs Officer)

E programa di Young Leaders of the Americas Initiative (YLAI) ya a habri pa duna oportunidat na hóbennan emprendedó sigui un programa na Merka durante di 4 pa 6 siman. Sady Elhage (Konsulado merikano), Junaiska Geferts (Alumni di YLAI) i Eric Elliott (Public Affairs Officer) a duna un splikashon di e programa enkuestion. E programa ta unu internashonal ku ta ofresé hóben emprendedó oportunidat pa desaroyá nan kapasidat di liderato, amplia nan konosementu empresarial i establesé kontaktonan internashonal.

YLAI pa e hóben emprendedó

Sady Elhage a splika ku YLAI ta un programa di interkambio kaminda nan ta buska hóben empresario entre 25 pa 35 aña ku deseo pa krese den nan negoshi. Nan negoshi mester tin por lo ménos 2 aña  di eksistensia i nan mester por proba di a hasi algu na kresementu i nan ke sigui krese mas. Nan ta apliká i nan ta pasa dor di un proseso di solisitut i ta skohe un ganadó ku ta bai Merka 4 pa 6 siman i ta sigui den un programa yuda nan den nan kresementu di negoshi i personal. Nan ta sinta ku un partner merikano similar na nan negoshi pa nan por wak kon esaki su negoshi ta drei. I asina ta kompará kon ta hasié na Kòrsou. No ta un korementu di stazje i tampoko ta bai traha pa otro hende pero ta un programa di interkambio ku un business partner pa nan dos huntu interkambiá di idea i asina krese profeshonal i komo persona.

26 partisipante te ainda for di programa YLAI

E programa YLAI ta eksistí for di 2015 i Kòrsou a partisipá for di 2016. Semper a skohe 4 partisipante for di Kòrsou,Aruba i St. Maarten. Awor aki tin 26 alumno esta 26 persona ku a yega di partisipá. E aña aki ta skohe 7 partisipante esta ta ekspandé e programa. Sierto di e programanan di Gobièrnu merikano a pasa dor di un reforma i esaki tabata positivo pa nos region. Nan ta invertí mas den hóbennan den e region aki. Banda di ekspandé e partisipantenan, awor por nominá i aseptá partisipashon di hóbennan di Boneiru, Saba i St. Eustatius.

Kriterionan

Pa por kai den e posibilidat di partisipá tin algun kriterio pa tene kuenta kuné. Esun promé ta kue hóben mester ta entre 25 i 35 anja. E mester tin negoshi i prueba un kresementu pa 2 aña. Tin bia nan ta haña komo reakshon di e hóben ku e tabata hasi un negoshi i awor ta hasi un otro, pero si nan dos huntu ta yega 2 aña tambe e por apliká. Tambe e persona mester por dominá ingles. E programa ta konsistí di 250 hóben empresario den region di Karibe i Latino Amérika i tur lo ta na Merka pareu i e idioma mester ta ingles. Tambe mester por kualifiká pa un J-Visa. Aki na Kòrsou si nos ke bai Merka ta apliká pa e Esta pero pa e programa di partisipashon na YLAI ta otro. E partisipante mester tin un J-Visa. Pa bini na remarká pa e J Visa e persona mester a hasi kos di bon mucha i un bon kondukta. E no ta rekerí un dokumento di bon kondukta, pero ta preguntanan ku tin di yena i e aplikante mester ta honesto ku esaki.

Tur gastu kubrí

Sady a sigui konta di e programa YLAI i a bisa ku e partisipantenan ta kuminsá na un estado ku algun dia di orientashon i despues pa 4 siman pa bai diferente siudat. Ta 18 siudat ta partisipante i e partisipantenan lo keda repartí. I na final tur lo topa otro bèk na Washington DC pa un orientashon i klousura. Sady a konta mas aleu ku tur kos ta keda kubrí pa gobièrnu merikano. E úniko kos si e persona ke bai hasi kompra e mester tin su mes sèn. Ta kubri for di e proseso di aplikashon di Visa, i por ehèmpel si e partisipante ta biba na Aruba, ta kubri su buelo pa Kòrsou pa e bin apliká aki pa e Visa. Ta kubri estadia i lo duna algu chikí pa kome. E ta kubri maleta i seguro básiko di malesa. Si kisas e partisipante ke kumpra un suvenir òf bai un kaminda ku no ta parti di e programa, esei e mester kubri e mes.

Negoshi dediká na hasi ganashi

E programa ta habri i no nesesariamente ta konsentrá riba un área. E aña aki solamente a pone atenshon ku e negoshi mester tin intenshon pa hasi ganashi, pues no por ta un fundashon pero un negoshi pa hasi ganashi. Kisas e negoshi no ta einan ainda, pero esei mester ta su meta. E mester ta kresementu ekonómiko pa hemisferio wèst i pa Merka tambe. Si e negoshi ta traha plaka sea ku bende prenda òf merkadeo, e punto final ta e kresementu ekonómiko.

Emprendedó di prenda

Junaiska Geferts a partisipá den YKAI na 2022. Junaiska ta un emprendedó di prenda trahá di kalbas. El a konta su eksperensia i kiko e ta hasi i tambe partisipante den e programa di YLAI. El a konta nos ku un alumno, esta un eks partisipante a aserk’é i bis’e ku e ta pas presis pa e programa. E persona ei a motiv’é i a yud’e ku e solisitut i kontestanan ku tin di yena. Asina el a keda inspirá pa partisipá. Junaiska a bisa ku el a apliká diferente bia i kada bes e tabata falta algu pero finalmente na 2022 si el a logra. E tabata felis dor di a keda skohé.

Sera konosí ku Bold Fashion Curaçao

E hóben emprendedó aki ta den e área di moda i asesorio. El a konta nos ku e ta un Walking Billboard pasobra e mes ta promové su produktonan. E ta kòrda ku for di skol básiko e tabata gusta obra di man. E tabata bai kas ku su kosnan i tabata pidi su mama pa mas. Segun el a sigui krese, el a sigui dediká su mes na su obra di man. Dado momentu su wowonan a kai riba boton ku e tabata kolektá. El a bira riba e idea di traha un kadena di boton i asina el a traha su promé kadena. Tur kaminda ku el a bai hende tabata gusta su kadena i asina Bold Fashion Curacao a nase. Asina el a hasié ofisial i a subi Facebook kuné. E negoshi a sigui krese i dado momentu el a keda introdusí na kalbas.

El a keda inspirá pa un kolega ku a puntr’e dikon e no ta traha un asesorio for di un material di Kòrsou i den e kaso aki kalbas. El a haña un kalbas grandi ku el a dal abou i a kai namorá mesora. Dado momentu el a dal den un potrèt ku e i su ruman bou di un palu di kalbas. Esei a mustra kon hende por bai bèk i yega na su propósito i den su kaso ta for di chikí e lo tabata intenshoná pa traha ku kalbas. Trahando ku kalbas ta dun’e un dushi sentimentu i p’esei abou Bold Fashion su materia prima ta kalbas. E empresa aki tin 12 aña kaba. Na 2015 el a kuminsá ku kalbas i awor aki tur kos ta ku kalbas.

Espektativa

Kiko tabata Junaiska su espektativanan na 2022 ora e mester a bai Merka den e programa di YLAI. Segun el a konta nos, el a kere ku e lo a topa mesora ku e merkado merikano i pa Bold Fashion ekspandé einan. Esei tabata su idea pero na final di e programa el a haña diferente konekshon pa e drenta e área ei pero kon e por bin bèk i kontribuí na su pais. E kontaktonan ei e tin te awe i tin e ta hasi negoshi kuné te awe. I no solamente ku Merka pero el a haña kontakto ku diferente otro pais pa hasi negoshi kuné.

Bai ku mente habrí pa konosé otro idea

4 pa 6 siman por ta mustra hopi pero e programa ta simplemente meskos ku ta den bo negoshi bo ta na Kòrsou pero solamente bo ta bai hasié den un negoshi similar na di bo pero mas grandi i siña di nan.l Meskos ku nan ke sa di e kultura di Kòrsou, e tambe kier a sa kon nan ta hasié dia pa dia. Por ehèmpel Junaiska a bisa ku e tin un negoshi ku ta Online i no físiko. E no tin un lugá pa risibí kliente i e kompania ku el a bai ta meskos. El a siña kon nan ta atendé ku e plataforma online  nan pedidonan. Ta meskos ku na Kòrsou pero bo ta siña i kontribuí ku bo konosementu na e kompania ei tambe. Junaiska a bisa ku el a bai Charlotte North Carolina i el a puntra su mes ta kiko e lo bai hasi einan. Nunka el a tende di e lugá ei i e tabata spantá, nèrvioso. Pero e hendenan di Charlotte ta hendenan ta asina amoroso i nan tin  hopi kos meskos ku Kòrsou. E konekshon ku e hendenan tabata unu ku el a sintié integrá mesora. I ora e ta kana e ta haña kòmplimènt. Ora el a yega e kompania ku el a bai, nan tabata asina amikal i a asept’é ku un brasa pa yud’e i pa konosé. I p’esei Sady a bisa riba e punto aki ku ta importante pa e partisipante keda ku un mente habri ora e ta bai, pa asina e risibí delaster kos. No mester bai ku un espektativa pasobra esei no ta intenshon den e programa pero bo mester ta habri.

No ta nesesario p’e negoshi tin un “front”

I despues di a pasa dor di e programa aki, Junaiska a bisa ku na Kòrsou tin e persepshon ku e negoshi mester tin un Front esta un lugá físiko pa bende pero el a siña ku esaki no ta nesesario. E por hasié via su plataforma online i e forma ku e ta presentá su mes ta keda kambia. E parti di merkadeo bo mester ta hopi di focus riba dje. I esaki ta loke a kambia su focus despues di a programa. El a bai konsentrá mas kon pa hala atenshon di e hendenan online. I siendo den eksterior pa asina largu, el a prepará su mes pa negoshi aki na Kòrsou por a sigui kana. El a bisa ku el a prepará tur produkto delantá i e úniko kos ta ku e hende tin di bai tuma e produkto serka dje. I asina e negoshi a sigui kana siendo ku e no tabatei. I banda di esaki el a bai ku produkto Merka pa regalá i alabes pa a bende.

Ambishon empresarial

Kiko ta Junaiska su ambishonnan empresarial pa e próksimo 5 aña. Riba e pregunta aki, ku un sonrisa riba su kara el a bisa ku su ambishonnan a kambia kompletamente for di 2022 ku el a partisipá den e programa na Merka. Awor e ta enfoká mas riba promové Kòrsou entre otro duna tayernan. E ke pe hende sa di e benefisionan di kalbas. El a traha su liña di asesorio i a krese su liña ku entre otro bela i tambe e tayernan kaminda e hende mes ta krea su produkto. E ke pa Kòrsou bira mas konosí pa medio di e kalbas.

Si bo tin un idea focus riba dje

I pa e hóbennan ku lo ke partisipá na e programa aki, Junaiska a bisa ku una bes bo tin bo negoshi i bo idea i a kuminsá kaba kuné, sigui kuné i maske bo no a keda aseptá den e promé aplikashon no pèrdè speransa. Den su kaso e mes a apliká 2 pa 3 bia i tòg a sigui purba., E ta bisa e hóben pa apliká i kere den su mes. El a bisa ku e hende mester kere den su mes i firmemente i keda ku e enfoke aki.

Inskribí awor pa YLAI

Sady di su parti a bisa ku e programa ta habri kaba. Por subi riba YLAI.state.gov-apply i apliká. E proseso ta poko intensivo i p’esei no warda te 8 di novèmber ora ta e deadline pa hasi aplikashon. E preguntanan ta tuma nan tempu pa por keda kontesta. Sady sa di hende ku a bai kantu di laman pa tur trankilidat i yena nan kontestanan. Mester por splika i argumentá hopi bon. Unabes apliká, e benefisionan ta hopi. Despues e proseso ta sigui, pa pasa den entrevista i pa febrüari 2027 ta sa i pa yüni/yüli 2027 biaha.  I despues di e programanan, konsulado merikano ta keda den kontakto ku e alumnonan/eks partisipantenan. Nan ta organisá aktividatnan kaminda e eks partisipantenan aki ta tuma parti na dje i den futuro ta spera di por ofresé “grants” ku ta fondonan chikí pa organisá aktividatnan pa komunidat.

Resultadonan konkreto ta keda na kada partisipante

I kon konsulado merikano ta garantisá ku e programanan aki ta trese resultadonan konkreto pa komunidat i no solamente individual pa e partisipantenan. Riba e punto aki Sady a splika ku esaki ta keda na kada partisipante. Esaki pasobra e J-Visa ku ta apliká pa bai Merka kuné, tin un klóusula den dje ku ta bisa ku pa e próksimo 2 aña  despues di e hóben su partisipashon e no por bai biba na Merka. E partisipante (eks) mester invertí su konosementu atkerí na su pais. Di e manera aki ta garantisá ku e persona mester bin bèk i kaminda su eksperensia por keda hinká den su mes pais. Konsulado Merikano ta hasi di su parti pero ta keda na e hóben partisipante tambe kon leu e ke yega.

Mester hasi mas na Kòrsou pa e hóben emprendedó

I despues di a partisipá na e programa aki, Junaiska ta bisa ku na Kòrsou por hasi muchu mas pa hóbennan emprendedó ku talento. Por ehèmpel na Merka ta bin ku diferente oportunidat i indiká den kua direkshon por bai pa tin oportunidatnan. Esaki e ta sinti falta di dje na Kòrsou, kaminda bo ta haña un hende ku por guia e hóben emprendedó kon bai leu e por hiba su negoshi. El a bisa na Kámara di Komersio na Merka nan a duna esaki, guiando e emprendedónan kua direkshon nan por bai. Ideanan ku Junaiska a haña einan el a bin hasi na Kòrsou manera tayernan ku e ta duna na skolnan, kompanianan i na hotèlnan i semper bai usando kos di Kòrsou mes i no solamente bende prenda.

Public Affairs officer

I na final di e programa Djasabra nos a sera konosí tambe ku Eric Elliott ku ta e Public Affairs Officer nobo ku ta na Kòrsou for di sèptèmber. E ta envolví den asuntunan i proyektonan pa komunidat.