Edishon Di Imprenta

Perfumenan di Marcus Elizabeth ta “arte den bòter”

Komparti:

Angelo Marcus Elizabeth

 

Despues di 5 aña nos tin Angelo Elizabeth (Marcus) den nos programa di Djasabra.

Angelo ta un diseñadó i perfume, nasé i lantá na Kòrsou pero aktualmente ta basá na Amsterdam. Den e entrevista di 5 aña pasá el a papia di su kolekshon di tas pero den e edishon aki e ta mustra kon el a sigui desaroyá, sigui krese i a ekspand’é ku perfume i bela.

 

Salí for di un ambiente strèn

 

Angelo na palabra; Mi a nase i m’a biba te ku mi 21 aña na Kòrsou serka mi wela Delma Felisia. Dado momentu mi a haña chèns di studia i bira e hòmber ku mi ta awe. E ambiente ku mi a krese den dje tabata unu hopi strèn, pero ma siña hopi kos. Ora mi tabata biba serka mi wela, semper mi tabata sinta den kurá anto mi tabata ta skèch, mi tabata skèch voral mata, flor anto tin bia mi tabata skèch paña tambe. I asina ei ma kuminsá ku mi journey di kreatividat. E journey ei ma sigui kuné na Ulanda pasobra mi a mira hopi chèns i mi tabata mira mi amigunan tabata bezig ku nan mes kosnan i nan a inspirá mi. Nan tabata bisando ku mi ta hopi kreativo i ku mi tin di hasi algu ku e kreatividat ei. Anto e ora ei ma kuminsá den e mundu di moda esei.

 

Di moda pa perfume

 

Segun Angelo el a kuminsá den e mundu di moda i e tabata un sorto di Influencer. E tabata skibi  hopi di moda. E por yam’e asta un sorto di periodista. E tabatin su mes “vlog” anto e ta skibi tokante di e shownan. Asina el a kuminsá haña invitashonnan pa bai e shownan na Paris i hopi pais mas. E tabata bai show di diferente marka. Ta netamente e shownan aki ku a inspirá Angelo pa e tambe kuminsá hasi meskos. Esei a pone ku el a bai studia den e direkshon ei. Angelo a kuminsá ku su estudio di moda. El a hasi e estudio dos aña i despues tambe a studia den direkshon di traha tas na London.

 

Holó ta konektá ku memoria

 

Dado momentu el a bai Amsterdam bèk i a bai kai nèt den temporada di Corona. Kedando sera den kas el a disidí di kuminsá traha bela e mes. Belanan ku tabata hole dushi ku ta netamente loke e tabata gusta. Belanan ku holó relahante, ya komo tabata un temporada di hopi strès i kaótiko. E tabata traha bela i duna su amigunan. I ku bela i e aromanan el a kana drenta e mundu di perfume, ku tabata un mundu hopi interesante pa Angelo. El a splika ku perfume tin un konekshon ku memoria. “Ora bo hole un sierto holó, e por laga bo kòrda un hende, un lugá òf un okashon. Anto esei mi a gusta. Mi a haña ku tabata algu hopi fuerte kon un holó por laga bo kòrda un hende”.

 

Belanan ku holó apart

 

Angelo a hasi esaki su profeshon. Mirando kon hendenan tabata gusta e holó di su belanan, el a kuminsá traha esakinan pa bende. Ounke ku tabata mei mei di e temporada di Corona e kosnan a kuminsá drei. E ta kòrda ku su promé entrada na luna tabata di 3 mil euro. Esaki tabata algu hopi bon i a dun’e aun mas empuhe pa sigui pasobra tabatin algu den su belanan ku e hendenan tabata ke asina tantu. El a kuminsá haña e pedidonan tur luna pa bela. “Na Amsterdam nos tin e Amsterdam Dance Event ku ta un periodo di un siman kaminda hendenan grandi den muzik ta bin huntu. Bo ta haña DJ, Produktornan. Dado momentu sinta ta traha na kas el a haña un email di un DJ hopi konosí na Merka. El a bis’é ku e ke kumpra su belanan pa su kasnan. E ta biba na Oropa pero tambe tin kas na Merka. E DJ aki a dun’e empuhe pa e sigui traha su belanan pasobra e ta gusta mira hende koló pretu ta destaká i bai dilanti. E belanan di Angelo tabata keda bendí na un hotèl kaminda e DJ tabata keda i asina el a bin den kontakto ku Angelo. I despues di 2 aña el a disidí di lansa su mes perfume.

 

Angelo komo Master Perfume

 

El a sigui konta nos ku el a bai diferente tayer di Master Perfume. Ta trata ta tayernan pa por traha perfume. Ta un estudio na Paris pero den su kaso el a bai tayernan i tabata manda mensahe pa e Master Perfumenan na Ulanda i serka nan e tabata siña e trikinan. Sinembargo otro aña e ke bai un tayer na Paris pa 2 siman pa e por haña su sertifikado.

 

Marcus Elizabeth a nase

 

Angelo su produktonan ta karga e nòmber di Marcus Elizabeth. El a splika nos ku na sierto momentu el a puntra su mama kiko ta su otro nòmber ku e falta, ya ku su rumannan tur tabatin mas nòmber i e mama a bisé algu manera Marcus. I asina e ta usa Marcus Elizabeth. Tempu e tabata biba na London i hasi kosnan ofisial i ora e duna su identifikashon nan tabata keda sorprendé ku Elizabeth ta su fam, pasobra ta nòmber di nan reina.

 

E proseso di traha perfume

 

Angelo a kuminsá ku traha tas, despues moda i awor perfume. Tabata interesante pa nos sa ta kua e ta gusta mas. I su kontesta ta “mi por bisa perfume. Mi gusta e proseso di traha perfume pasobra bo mester tin hopi pasenshi. E no ta algu fásil pasobra hopi bes e perfume no ta hole dushi i no ta stabil. I ora e logra algu dushi i úniko ta algu grandi pa mi. Mi estilo di perfume ta un fushon. Mi ta bini di Kòrsou i ta kombin’é ku e parti Oropeo pa e lanta na otro nivel. Esei ta mi proseso”.

 

Perfume tin un pasado kolónial

 

Segun Angelo su splikashon, ora el a kuminsá traha perfume el a hasi hopi investigashon riba perfume, unda e ta bin i su pasado. E ta haña esei hopi interesante, ya asina e tin mas konfiansa den loke e ta hasi. Perfume tin un pasado kolónial ku hopi hende no sa. E promé hende koló skur ku nan a usa den un propaganda di perfume tabata Old Spice. Tabata un hòmber koló skur riba kabai blanku. Ta mas òf ménos 20 aña pasá i awor aki Rihanna ta keda usa komo promé dama koló skur. Di Asia ainda no a usa niun ainda i esaki pasobra ántes tabata link nos hende koló skur i esnan di Asia ku no tabata hole dushi. I p’esei nunka promé a usa hende koló skur i asiátiko riba perfume i no tin hopi perfumeur koló skur asiátiko. Nos ta den un guera di perfume pasobra e ta birando inklusivo i ta kambiando. Angelo ta sinti ku e ta responsabel pa mustra ku nos tambe tin holónan dushi i nos ta hole dushi. I p’esei e ta gusta traha perfume.

 

Na nivel i perfekto

 

E tin algun nòmber di perfume manera Mango After Dark, Pistachio i hopi mas. El a konta nos ku Mango After Dark ta inspirá riba un kantante di Afrika i el a kanta algu di Meat me Under the Mango Tree i esei tabata e inspirashon pa e perfume ei. E kier a traha un perfume di mango pasobra na Kòrsou tin hopi palu di mango. Hopi bes ora kumpra un perfume di Mango, e ta hopi tropikal i legt i den su kaso e kier a hasié mas sèksi i mas kaluroso. Angelo tin un manera di traha ku tur loke e hasi e ke pa esaki ta na nivel i perfekto. I e ta skohe hopi bia konsepto ku otro hende por mira algu den dje ku nan ta komprondé e direkshon ku e ke bai. Ta hopi investigashon e ta hasi pa asina elevá su marka. Meskos e tin Pistachio Horizon ku ta hole manera zonnecreme. E ta gusta Pistachio i asina el a kombiná esaki. Den Karibe tin un fenómeno ku yama Neptune Wink i esei ta 5 sekònde promé ku solo sali òf baha e ta bira bèrdè. Hopi hende no a pone atenshon na esaki. E ta un fenómeno di den Karibe.

 

Arte den bòter

 

Perfumenan di Angelo tin un nivel hopi haltu i p’esei tin hende ta konsider’é tin bia komo arte i p’esei ta mira su perfumenan hopi bia komo algu di luho. I hopi bia ta bis’e ku si ta 160 euro pa su perfume mas bien e mester ta mas karu i sigur por lo ménos 260, esei pa mustra kon haltu e nivel di su perfumenan ta. Su perfumenan ta arte den un bòter.

 

Masha poko hende koló skur den área di perfume

 

Angelo aktualmente ta biba i traha na Amsterdam, un siudat den un pais kaminda ta kasnan grandi di perfume ta dominá. Kon Angelo ta nabegá den e grandinan ei. Segun el a konta nos ora el a kuminsá tuma kontakto ku e fábrikanan, nan a bis’e ku ta promé bes nan ta bai traha ku un hende koló skur. Mayoria bia ta hende koló kla. Pero nan a haña su konsepto interesante., Esaki pasobra ta trata di un mundu hopi será i bo tin di studia na Paris i e ora ei bo por drenta e mundu. Ora bo studia na Paris, bo tin di bai stazje na e fábrikanan pero Angelo tòg a logra traha algun produkto bunita i e hendenan ta orguyoso di por a dun’e un chèns. Nan ta enkurash’é pa sigui hasi loke e ta hasié pasobra ta algu diferente.

 

Diferente i di kalidat

 

El a sigui konta nos ku e konosé un otro marka den Karibe pero no na su nivel. Por mira awor aki hopi perfume for di lugánan arabir i asiátiko pero nada di Karibe. I p’esei e ta sinti ku su mishon ta pa kompartí loke e ta traha ku mundu. Awor aki e ta haña hopi bestelling, for di Merka, Dubai, London i hopi mas. E kos aki e ta haña bunita ku hende ta interesá. Kisas pasobra loke e ta trahando ta diferente i di kalidat.

 

Kolaborashon ku Pata

 

Tambe Angelo a kolaborá ku Pata den e siman di moda na Paris. El a konta nos ku e no tin un tienda ainda pa pone su produktonan i esnan ku ke algu mester kumpra esaki online. E tin algun tienda ku ta bende nan pero e no tin su mes tienda. E ta haña hopi petishon pa su mes tienda pero esaki ta kostoso. I p’esei e ta bai para riba merkadonan na nivel haltu. Un bia pa luna e ta bai na un di e merkadonan ei pa e mira ken ta kumpra su perfumenan. Den un di e merkadonan e tabata papia ku un señora ku tabata ku su yu di 3 aña. El a konta e señora su historia i esaki a kumpra un bela. Un siman despues riba Instagram e señora a manda un mensahe pe i bis’e pa e bin na e ofisina prinsipal di Pata pasobra ke papia kuné. Asina e kolaborashon a kuminsá. E kombersashon ku e señora a bai bon i esaki a gusta su perfume i e historia di pasado kolónial. I e señora a bisa ku ta algu di komunidat pa komunidat i kier a bai mesora pa e kolaborashon.  Dado momentu a resultá ku e señora ku el a papia kuné tabata e CEO di Pata miéntras ku Angelo no tabata sa mes. Asina el a haña un bon oferta di Pata i a bai e Paris Fashion Week ku hopi hende a presensiá. I na e evento ei ta rònt mundu ta bin wak Pata pa mira kiko nan tin pa kumpra. I einan yen hende a reakshoná i a mira su marka i a kumpra tambe. E kolaborashon awor ta ofisial tambe. Awor lo bai e siguiente paso i kada dos aña lo lansa perfume nobo huntu.

 

Su soño ta pa un dia tin su mes tienda

 

Angelo su soño di mas grandi ta pa tin su mes tienda i tambe na Kòrsou. E ke pa na Kòrsou tambe por disfrutá di su kreashon. E ta soña un dia gana un premio tambe pa e mihó perfume. I si e tin di traha un perfume pa identifiká su mes, el a bisa ku e ta traha hopi ku sandal wood, Patuli i insence wierook. E ta kere e lo buska sierto flornan pa kombiná kuné i asina hasié mas interesante. P’e Patuli ta algu ku ta hala su atenshon meskos ku Sandal wood.

 

Si bo tin un idea, pusha padilanti i no stòp!

 

Angelo su mensahe na tur ku ta kana rònt ku un idea, e lo bisa nan pa no stòp. “Si bo tin un idea, un hòbi i bo hasié bo trabou, no stòp pasobra ami tabatin hopi bia ku mi kier a stòp. Tabatin momentu ku mi a bisa mi ta kansá pero semper ora mi sigui un kos grandi ta pasa. Mi ta kere ku su bo tin mishon, hopi i bo ta kere den dje i mi ta kere ku un hende mester sigui pusha i no stòp. I si bo tin e chèns di bai studia, esei lo yuda hopi”.

 

Artíkulonan relashoná

Laga un komentario