Noah Eisden I Susmaline Caciano

Noah Eisden i Susmaline Caciano ta dos hóben ku algun siman pasá a subi kaya komo polis. Sirbi i Protehá, manera e lema ta bisa, esei ta nan meta tambe. Un a sali for di un kas ku famia polis i e otro a disidí di djòin kuerpo pa e por duna e eksperensia ku e lo tabatin gana di haña serka polis. Djasabra a papia ku e dos hóbennan aki, ku a haña nan preparashon di ORV (Opleidingsinstituut voor de justitiele keten, rechtshandaving en veiligheidzorg).

Hasi un diferensia

Susmaline na palabra splikando kon bin el a bai pa polis “mi a sinti falta di e asistensia na momentu ku mi a pèrdè mi outo. Mi a sinti falta di asistensia i atenshon ku mi tabata ke pa esei mi a disidí di bai duna un man. Mi gusta variashon tambe  p’esei mi a disidí na solisitá pa asina por duna un man na komunidat.”

Noah  na palabra tambe splikando dikon el a skohe bira polis “ami ta bin di un kas di polis, mi tata ta polis i e kultura ei mi a lanta den dje. Mi tabata na wardakosta promé i awor ma skohe pa bira polis”.

Sali for di kas di polis

Pa por a djòin polis, nan a bai den e werving. Esei no tabata fásil pero un tiki molèster i kansansio pasobra bo ke haña e kontesta pa kaba. Bo tin di bai e tèst di deporte despues warda i bai pa tèst sikológiko i mester a keda kada bes warda pa kontesta i esei ta algu ku a hansha Noah poko pasobra e tabata ke haña kontesta pa kaba. Pero despues riba kaya tabata dushi. Noah a bisa ku komo su tata tabata polis i e mes komo wardakosta tabata tòg un tiki fásil pa el a pasa den e sistema pa bira polis. Noah saliendo for di un kas ku polis i mirando e trabou, el a bira ku e ke ta meskos kue úniko diferensia ku e komo hóben, ke yega mas serka di hóbennan. “Ku e generashon di awor aki, lo mi e trese un kambio den komunidat”. I komo un hóben ku ke aserka hóbennan su intenshon ta pa e papia ku hóbennan, motivá nan den e bon direkshon i kiko ta e konsekuensia ora bo hasi malu. E ta kere ku hopi hóben no sa e konsekuensia pero simplemente ke konta den sierto grupo.

Mas empatia i komprondementu

Susmaline ke mustra ku por otro. I ku otro el a bisa ku ora un persona aserká polis, e ta wòrdu skucha, e atenshon ta bai na e persona ku e meresé i deseá i e parti di wak kon ta sigui ta importante. Polis tin hopi trabou pero e doló di e persona, e empatia i komprondementu lo ta bon pasobra e persona lo sintié mas trankil. E ta pensa kisas di papia ku e víktima, laga e persona sintié trankil i esei ta loke e ke hasi un diferensia. Mirando e echo ku e parti di hòrtamentu di outo a bira asina grandi i mester di mas kolega i tòg si kada kolega keda enfoká riba e parti di yuda e víktima i bin ku ideanan kon pa kombatí e hòrtamentu di outo ta loke ku e mas ke yuda kuné. Susmaline a pone hopi atenshon na e parti di komprenshon i empatia pa e víktima. E no ta kere den tende tur doló ku un persona tin pasobra e no ta sikólogo pero e parti di empatia si e ke konsientisá su koleganan.

Reto i algu diferente

Tur e dos hóbennan aki a pasa nan estudio i entrenamentu na ORV ántes skol di polis. Pa Susmaline su eksperensia tabata hopi bon. Un reto i algu diferente. Mirando ku e ta un persona fleksibel, e ta gusta deporte i gusta move i p’esei e tabata dushi pero otro. Banda di e parti físiko tambe tin e parti di teoria. Ta tur kos riba otro pero un reto pa bo krese, madurá i kambia komo persona. Pa Noah tambe e tabata un dushi eksperensia pa e por siña manehá bo tempu i tene bo mes den kondishon. Den un klas i mei mei di personanan ku diferente karakter el a siña kon nan ta motivá otro, pusha otro pa asina por yega e meta. Tabata un dushi eksperensia pa mira un klas ku diferente persona bira un. E grupo ku Noah i Susmaline a forma parti di dje a kuminsá den e estudio di polis na yanüari 2025 ku 16 persona. No tur a kaba pasobra 2 a kai afó.

“ontgroening”

Susmaline a bisa ku e no a imaginá su mes loke e ta bai topa kuné ora el a kuminsá den e selekshon pa bira polis. El a bisa di tabata prepará pa e parti di deporte pero no loke el a haña. Esaki a pone ku dado momentu el a disidí di hür un sala di deporte pa e por a bai trein apart. El a hasié pasobra bulamentu di bok, hisa bala pisá, e no tabata sa ku e por i p’esei el a bai trein. El a trein pa tur tèst pero tòg no ta loke el a ferwaktu voral e parti di “ontgroening”. Tantu Noah komo Susmaline a pone atenshon riba e parti aki di e tèstnan ku nan a pasa aden. Tabata tèstnan pa saka nan for di nan zona konfortabel, laga nan keda pendiente mardugá, pusha nan pa e límite pa wak te kuantu nan por wanta pa wak si e grupo ta keda huntu. Den e tèstnan kier a wak si nan ta sostené otro i keda komo tim. Ta 2 siman pa echt sera ku otro den e klas. Tabata duru pero algu ku nan a eksperensia ku plaser finalmente. I p’esei pa susmaline e eksperensia ku hamas e ta lubidá den esun aña i mei ku el a trein pa polis, tabata e parti di “ontgroening”. El a bisa ku si e tin di bolbe haña un tèst di “ontgroening” e lo bai mas prepará, pero no ku e tin gana di pasa aden. Pa Noah sinembargo e loke e ta konsiderá un eksperensia inolvidabel ta ku ora di èksamen nan ta bira unu, nan ta siña te lat i asina motivá otro. Esun ta yuda e otro kaminda e tin mester di esaki.

Praktiká loke a siña

Den e aña i mei preparando pa bira polis, nan a bai diferente stazje  i asta a traha un  ratu den e temporada di karnaval. Bou di guia di nan mentor nan a bai i esei a yuda nan pa práktika loke nan a siña di buki. Einan nan por a mira e realidat di den kaya. Loke nan a siña na ORV nan por  a pone pone den balansa riba kaya. Si na ORV nan a haña kasonan for di buki, riba kaya nan ta haña e kasonan ku e persona bibu nan dilanti i nan mester a ehekutá loke nan a siña.

Komo polis e hóben ta sali ORV ku un pakete total

 Pa loke ta nan eksperensia na ORV, e hóbennan polis aki tabata positivo. Nan a bisa ku kada dosente ta otro pero loke si a resaltá ta ku si nan komo e studiantenan sinti falta di algu, e dosente ta kla pa yuda.  Banda di deporte, tin leinan espesialmente esnan penal ku ta rekerí hopi atenshon i dedikashon. Tambe nan ta haña EHBO, kon traha ku hende “lichtverstandelijk beperking”. Nan ta siña rekonosé e persona asina e kuminsá papia ku nan. Nan a haña un kurso spesial pa eseinan so pasobra e ta kresiendo mas den komunidat. Nan a siña pa tin empatia ku nan.  Kemen tin diferente tarea mas ku deporte so. E ta hopi pero no algu imposibel pa por logra. Meskos ku idioma tambe ta un reto pa nan. Hopi ta lanta den idioma ingles na televishon, pero na ORV ta pone atenshon riba tur e idiomanan importante manera spañó i ulandes tambe. Komo polis nan ta haña nan den kontakto ku diferente kultura i tur mester di su atenshon.

Polis no ta solamente kore tras di ladron

Siña pa polis no ta solamente sali kore tras di ladron i detené, e ta muchu mas i esaki Noah i Susmaline a pone énfasis riba dje. Ta un pakete total nan a haña, diferente lei, LTU ets ets. Ta un pakete total nan tin di siña i e reto ta dushi si, segun nan a bisa. I loke nan a hasi durante di nan periodo di stazje nan ta pasa den e prueba di kompetensia. Noah a splika ku e prueba aki ta hasi nan poko nèrvioso, ounke ta kosnan ku nan a siña i hasi den nan stazje. E prueba di kompetensia ta inkluí un senario ku nan ta haña pa atendé. Por ehèmpel sentral di polis ta manda nan un asistensia i einan ta wak kon na ta intermediá, kon ta buska solushon, si tin di detené e persona ta wak kon e ta sosodé. Ta wak kon nan ta ehekutá loke nan a siña den nan periodo na ORV. Nan a pasa den un prueba asina den tráfiko tambe, kaminda tin di para un outo, kon ta aserká e persona i kon ta dun’e un but si e tin di haña esaki.

E balansa di trabou i privá

E balansa di trabou i bida personal, ta un pregunta ku tantu Noah komo Susmaline a kontestá. Den kaso di Noah e tin un yu di 3 aña i ora e ta na trabou ta na trabou e ta i ora e ta kore bai kas e ta purba laga e problema kaminda e ta. Si e hende tin un problema no ta kuné, pero ku su unifòrm. I den su bida personal e tin di buska un balansa. Noah ta konsiente ku ser polis ta trese su kosnan ku e no por bai tur kaminda, e tin di wak kon e ta bisti, kon e ta aktua pasobra  e mester ta un ehèmpel.  Den kaso di Susmaline el a bisa ku ainda e ta buskando e balansa. Komo hende muhé e ta otro voral ora bo ta baila, spòrt, sali. E parti di balansa e tin si pero no ta fásil. Komo polis bo mester ta un ehèmpel i hende ta wak riba bo. Susmaline a bisa ku e no tin problema ku asuntu di problema i bai kas kuné pasobra e ta gusta tende su muzik i e tin su mama i tata semper pa papia kuné. El a bisa ku for di ora el a kuminsá na ORV e ta buska su balansa. E ta lucha hopi ku su mes pa unda e por bai òf unda no.

Invertí den bo outo pa evitá ladronisia

Susmaline a pasa den un eksperensia desagradabel na 2021 ku su outo a keda hòrta. I p’esei awor komo polis loke e por konsehá otronan ta pa invertí mas tantu posibel den bo outo. Tin diferente kos ku por pone na un outo ku ta evitá ku nan ta hòrt’e, sòru pa e outo ta seif den kurá, sistema di alarma i tambe GPS. Eseinan ta kosnan ku e no tabatin pero a hasié konsiente pa invertí pa evitá i duna e ladron ménos chèns.

Sigui krese den polis

E karera den polis tambe ta un reto pa e dos hóbennan aki. Susmaline di su parti a bisa ku e ke sigui krese, e ke sigui siña, e ke gana eksperensia pa e por ta e diferensia. E ke ta e diferente entre otro den e parti di derechi di hende muhé i pa ku su mes. E no tabata un persona asina habrí. Awor e ta mas sigur di su mes i mas fuerte. Noah di su parti tambe ke sigui krese. Pero awor e ke kuminsá trankil i wak e opshonnan ku tin pa wak kua ta pas kuné. E tin di bai pa algu ku ta pas kuné pa asina e por hasié ku amor.

Mensahe na nos hóbennan

E trabou di polis ta dushi, varia i bon pa bo futuro. I asina aki bo ta duna bèk na bo komunidat, protehá bo hendenan. Ta dushi pa bai kas i bisa ku bo a sirbi i ta orguyoso di dje. No laga pa hende deskurashá bu pero keda motivá, para pa loke bo ke i semper kòrda e motibu dikon bo ke kuminsá.