Renaud Hendriks

Despues di Rei den Mei, awor tin otro wega Yega Bo tin ku Yega. Renaud I Saffira Hendriks ta lansa otro wega. Pa esun ku konosé Mens erger je niet lo gusta e wega nobo aki pasobra e ta kasi meskos pero ku e toke lokal, e toke di nos historia i kultura. Den e entrevista anterior ku Renaud, nos pregunta tabata kiko ta bai sigui Rei den Mei i nan a kontesta ku si. I esei nan a hasi i a inová un wega eksistente. Renaud a bisa ku Kòrsou meresé algu nobo. I p’esei awor nos tin Yega bo tin ku Yega.

Usando hopi elemento di Kòrsou

Renaud a splika den e entrevista ku nos a hasi kuné for di Ulanda ku ta trata di un Mens Erger je Niet krioyo kultural. Riba e  kaha por mira nos fèri ku ta kore di Punda pa Otrobanda. St. Kristofel,. Hofi Mango, e toren di lus na Klein Kòrsou i den e kaha ta haña un splikashon di Kòrsou. Nan a kue Kueba di Hato i e trapi kolórido i elementonan di Kòrsou ta e destinashon. E Mens Erger je Niet koló kòrá su idea ta pa sali kas i yega bo kas bèk. I serka Yega bo Tin ku Yega bo ta sali kas pa bo yega sea Hòfi Mango, Klein Kòrsou, St Kristofel, Kueba di Hato òf e trapi kolórido.

Sali kas i yega un destinashon

Renaud ku su sonrisa a bisa ku ora e ta hunga Mens Erger je Niet, e no tin kasá e no tin yu, e no tin ruman e no tin famia mes. Kon ku para para pasobra ta yega bo tin di yega bo destinashon. I p’esei a yam’e Yega bo tin ku Yega pasobra ta esun tin di sosodé. Loke e ta gusta di Mens erger je Niet ta ku tin hopi mamamentu di gai. Bo ta mata e hende, bo ta den kayente i yen kos. I awor e ta bira pió pasobra tin destinashon mará na e wega pa bo por ta asina kreativo i mama otro su guy. Por ehèmpel bo tin di kue Fèri pero bo no a logra i bo por bisa e otro “bo no a yega Punda ainda anto, Fèri a bai laga bu anto”. Nan a pens’e di un manera pa hasi e eksperensia mas dushi, bo no ta sali kas i bai kas pero bo ta sali kas bai un destinashon ku ta algu na Kòrsou. Ta un kos bo tin di hasi Yega bo tin di Yega.

Algu ku e turista por bai kas kuné

Relashoná ku e idea pa e wega aki, Renaud a bisa ku nan kier a traha algun spèl i no tur ku tei kaba pero e spèlnan ku ta fásil pa hunga i weganan ku fásilmente por dun’e konekshon kultural di nos. Mens erger je Niet tabata entre e ekstenshon di Rei den Mei i algu otro. E promé idea tabata pa traha diferente senario manera bai Bándabou i bai Hòfi Mango i Kristofel pero ora pone riba e bòrchi e ta bira muchu kos. I p’esei nan a skohe pa un opheto ikoniko kultural di Kòrsou i esei nan a pone. Asina nan a skohe pa desaroyá nos propio Mens erger je Niet i tambe a skohe pa e diseño final ku ta algu kultural. Desaroyo di e wega aki tabata ku den mente no solamente nos hendenan lokal pero tambe e turistanan tin algu ku nan por bai nan kas kuné. Nan por konosé nos kultura i nos historia. E turistanan lo mira un di e kosnan aki sigur ku nan ta topa riba e wega Yega bo tin di Yega. Asta si nan bin ku krusero nan por wak e fèri di Punda pa Otrobanda. I p’esei a traha e kaha kompakto i fini pa por transportá fásilmente. Den e kaha e instrukshonnan ta na papiamentu i ingles. E peonnan ta bunita representá banda di otro i no den saku di plèstik. Tambe  a pone 2 dou pa no mester warda riba otro. Nan no ke imitá pero inová i p’esei tin un banda ku 6 hende por hunga i e otro banda 4 pero ku diferente koló. Meskos ku Mens Erger je Niet bo tin di kana rònt i yega kaminda bo a kuminsá ku ta bo destinashon. Den e kaso aki tambe, si un hungadó topa bu den su kaminda i bo kai meskos kuné, ta morto bo ta i bai kas. I p’esei den e wega aki no tin famia, no tin kasá i no tin yu. Renaud a bisa nan purba hinka regla èkstra pero el a bira kompliká i p’esei a disidí di lag’e manera e ta. I bon di e wega aki ta ku no ta nesesariamente pa bo papia papiamentu ni komprondé pa por hunga.

Edat mas abou

Ku e wega di Rei den Mei e edat ku por kuminsá hung’e ta 14 aña, e momentu ku e hóben ta komprondé e diferente tareanan pa hasi. Pero den e kaso di Yega bo tin di yega. Den e wega awor por kuminsá un edat mas abou di te asta 4 aña pero nan a pone na 6+. Nan ta tene kuenta ku e muchanan chikí ta gusta hinka kos den boka i mester wak nan bon ku e peon. P’esei a pone na 6+.

Por spera mas wega

Un biaha mas ta pone atenshon riba e historia i kultura di Kòrsou ku ta konsentrá riba nos hendenan di Kòrsou pero tambe pa e bishitante. E promé wega tabata mas pa nos hendenan di Kòrsou pero nan kier a hasi algu mas amplio, algu pa e turista por bai kas kuné i kòrda riba Kòrsou. I weganan ku nan lo bai sigui traha nan lo sigui pone atenshon na otro hende ku no ta di Kòrsou so. Awor tin nan dos wega  pero lo bai spera mas. Una bes kuminsá riba kaminda aki, ta dilanti su ta sigui bai. Renaud a bisa ku nan mes ta dibertí ku e weganan i e no sa kuantu wega mas nan lo traha òf desaroyá/inová.  Renaud  a bisa ku loke nan ta hasi ta wak kon fásil e wega ta, kon ta hung’e i kon fásil ta pa inová i asina nan por hasié.

Un wega pagabel

Desaroyo di e wega Yega bo tin ku Yega a dura sigur un 6  luna pa nan por a keda kla kuné. Ounke esaki tabata ménos trabou tòg a dura mes largu ku Rei den Mei pasobra e diseño a tuma su tempu. Renaud a pone énfasis riba e produkshon di e wega. E tin su preis mará na dje. Rei di Mei tabata mas kostoso pa su elementonan. Nan ta gusta kalidat i esei ta eksihí su preis. Pero nan énfasis ta pa e wega ta pagabel i asina nan ta tene tambe.

Fin di novèmber e ta disponibel

Yega bo tin di Yega ta yegando Ulanda fin di novèmber pa kuminsamentu di desèmber. Asina e yega Ulanda, mesora lo manda pa Kòrsou. Renaud ta spera ku pa di dos òf di tres siman di desèmber a wega lo tei na Kòrsou tambe. E sa ku ta un temporada drùk i nan lo hasi nan máksimo esfuerso pa e wega tei disponibel na Kòrsou den e dianan di desèmber ei. Renaud a bisa ku nan a kuminsá ku e kampaña di bestèl delantá pa asina e wega yega, e por yega su destinashon rápidamente pa esun ku ta deseá.

Aprobá pa mi kasá promé

Den desaroyo di e wega aki i den esun ku nan a traha anteriormente esta Rei den Mei, si su kasá bisa ku algu no ta bon, no ta saka e wega. I den e kaso aki algun bia mester a kambia aki i aya te ora su kasá a bisa ku e ta bon. Esei ta e punto di salida pa Renaud, su kasá tin di kùr e bon pa asina por sigui kuné.  I e desaroyo di e wega tin su tempu mará na dje.

Hungamentu di spèl mester bira manera ántes

Ku e wega Yega bo tin ku Yega nos ta kita tablet i telefòn di nos yunan i bai bèk ku nan na e parti sosial den famia. I p’esei e toke kultural segun Renaud pa e hende sinti ku ta algu di dje. E ke ku tur hende sa ku loke nan ta hasi pa engrandese i elevá di nos bida i alegrá e bida, trese mas goso den bida, algu si bo tin den kas ta algu di bo isla. Nan ke pa tur hende sa ku esei ta nan meta pa sinti orguyoso di nos isla, trese mas alegria, goso i ambiente total. Tambe nan meta ta pa laga hungamentu di spèl i den famia bira bèk e kos manera ántes. Tiki tiki lo yega einan, asina Renaud a bisa.