WILLEMSTAD. - Djadumingu último Klup di Para Kòrsou ta wak atras riba un tremendo aktividat ku a tuma lugá na Rancho de Herberg. Esaki ta den kuadro di selebrashon di 70 aña di “De Vogel Vriend” ku tabatin vários aktividat den e último simannan.

Den kuadro di e selebrashon di 70 aña dia 27 di mei, dia 25 di mei tabatin un Santu Sakrifisio di Misa, pa despues dia 2 di yüni tabatin un tremendo bendementu di BBQ i djadumingu último hopi hende a haña kaminda pa Rancho de Herberg kaminda ku tabatin un ambiente formal ku bendementu di para, kouchi, blòk pa paranan brui, bendementu di mata etc.

Di akuerdo ku Stanley Ignacio e dia tabata un éksito i mayoria di e bishitantenan a kumpra para i tambe a bira miembro di e Klup di Para. Den un palabra un tremendo dia.

E siguiente aktividat lo ta un kaminata dia 2 di yüli benidero den un di e áreanan mas bunita di Kòrsou ku ta rondó di bahia di Willibrordus. E kaminata ta sali 6or di mainta i pasa den un area impreshonante.

Pa inskripshon por yama na number di telefòn 511-1737, señora Daniela ku ta koordiná e kaminata.

Pa esnan interesá pa bira miembro di Klup di Para, por akudí tur promé djamars di luna na “de Tamarijn” òf por drenta den kontakto ku Stanley Ignacio na number di telefòn 560-3653.

Finalmente Klup di Para ta yama un danki na Aquarian ku a kooperá engrande ku e aktividat di djadumingu último na Rancho de Herberg.