Den un dia a alkansá 100 mil lektor rònt mundu

 Lamentablemente Extra mester informá ku e edishon di imprimí no por a sali awe. Mester a tuma desishon for di mainta mirando e sirkunstansianan no muchu bon, ku a pronostiká i ku lo mester a tuma lugá. Mirando ku for di ayera tur kos tabata indiká ku e mal tempu lo a pasa awe den oranan lat di anochi pa tempran di djaweps mainta i teniendo na kuenta ku awe mainta e pronostiko a kambia, a opta pa sera ofisina i produkshon di e edishon di 30 di yüni no por mira lus di dia.

E desishon aki sinembargo no a kita ku Extra komo medio responsabel a sigui informá komunidat durante henter e dia di awe. Periodistanan i fotografnan, sea riba kaya òf na kas, a produsí pa e edishon digital di Extra ku a keda distribuí tantu riba website www.extra.cw komo riba página di Facebook, extracuracao. Extra ta gradisí pa tur e reakshonnan risibí for di tur skina di Mundu.

Un total di 35 artíkulo ku potrèt i video a keda produsí awe pa asina keda mantené lektornan na altura di tur e último desaroyonan relashoná ku prinsipalmente e mal tempu. Via Extra su website i página di Facebook, awe so a alkansá mas ku 100 mil lektor rònt mundu entre nan Kòrsou, islanan ruman, Ulanda, Merka, Colombia Noruega, Bèlgika i Sto. Domingo. Mayan ku situashon normalisá atrobe, Extra tei di forma kustumbrá pa asina djabièrnè nos ta den tur lokalidat kustumbrá. Danki pa e sosten i komprenshon.