WILLEMSTAD.- For di djabièrnè último outoridatnan a pone man riba un kuarteto di kual dos ta pareha di otro sospecha di entre otro  falsifikashon di dokumento, malversashon di supsidio i labamentu di plaka.

Ayera nan a keda presentá dilanti wes komisario ku a evaluá nan detenshon i enkarselashon. Tur kos a kana segun lei i konsekuentemente nan enkarselashon a keda prolongá ku 8 dia. Esaki ta nifiká ku aki 8 dia e kuarteto aki mester bolbe presentá dilanti wes komisario

Djabièrnè siman pasa trempan e tim di Kuerpo Polisial Kòrsou ku ta enkargá ku investigashonnan finansiero i di labamentu di plaka a tene sinku (5) entrada hudisial den kuadro di un investigashon ku a haña e nòmber Girasole.

E investigashon Girasole aki ta dirigí su mes riba falsifikashon di dokumento, malversashon di supsidio i labamentu di plaka. Den kuadro di e investigashon aki a tene entradanan hudisial na 5 adrès aki na Kòrsou.

Na Van Engelen a detené e dama L.P.G.C. di 48 aña di edat i e hòmber C.E.C. di 55 aña di edat, ámbos nase na Kòrsou. E duo aki ta kasa di otro. E homber ta laborá na Banko di Seguro Sosial SVB miéntras ku e muhé ta direktor na Wit Gele Kruis Curaçao. Aparte di ta laborá na SVB tambe e homber ta den Konseho di Supervishon di ACU. Esei ta motibu pa kual a tene entrada hudisial na e dos empresanan SVB i Wit Gele Kruis Curaçao aki.

Mas aleu un kas den Kwartier, a detené e hòmber A.S.V.I. di 54 aña di edat, tambe nase na Kòrsou. E sospechoso aki resientemente a rekobrá su libertat despues di tabata enkarselá pa kaso di Refineria di Kòrsou.

Remarkabel ta ku e dos sospechosonan maskulino C.E.C. i A.S.V.I. ta bon amigu di otro.

Tambe na un adrès na Sunset Heights a detené e dama C.O.G. di 45 aña di edat nase na Kòrsou. Relashoná ku e investigashon aki, e tim a konfiská kuater (4) outo luhoso, sèn kèsh i dokumentunan ku ta di importansia pa e investigashon.

No ta ekskluí posibilidat, ku durante di próksimo dianan mas detenshon lo por keda realisá.