WILLEMSTAD.- Ayera, algun dia despues ku wardadónan di prezu a pone trabou abou hustamente relashoná ku bahamentu di droga hasiendo uso di un drone, outoridatnan a logra pone man riba e promé tres sospechosonan.

Ayera alrededor di un or di mèrdia, Sentral di Polis a risibí informashon ku den área di Bapor Kibrá tin un pikòp ku den su baki un drone ku probablemente tabata transportá droga pa prisòn.

Mesora a dirigí unidat na e sitio i a bin topa ku e pikòp aki.

A kuminsá un persekushon den algun kaya den Koral Specht i riba Dr. Maalweg polis a logra di para e vehíkulo aki.

Na e sitio a detené e hòmbernan H v.d. G. Di 20 aña di edat i L.A.R. di 19 aña di edat, ámbos nase na Kòrsou.

Tambe a konfiská e drone. Kontinuando ku e investigashon, a tene tres (3) entrada hudisial na respektivamente Kaya Sakadó, Welensaliweg i Groothornstraat.

Na e kas den Kaya Sakadó, polis a detené e hòmber J.A.D.D. di 33 aña di edat nase na Kòrsou i na Welensaliweg a konfiská algun artíkulo, ku ta di importansia pa e investigashon.

Ta siman pasa Wardadónan di Prezu a bolbe bati alarma, pa no mester kore tuma medida ora ku ya baka a hoga na pos. Masha dia Wardadónan di Prezu ta pidi atenshon pa e situashon di “drone” ku nan ta konsiderá komo un aspekto di seguridat primordial.

Despues di un akshon relámpago ku Wardadónan di Prezu a pone, ta sali na kla ku nan preokupashon di mas grandi ta e asuntu di “Drone” ku tur dia ta bula riba e kompleho i asta ta baha den prizòn i laga kos atras. Wardadónan di prezu ke un solushon mas pronto posibel o sea urgente pa dominá e situashon aki.

Pues e situashon ta den man di esnan ku tin e maneho di prizòn den man i ku ta esunnan ku ta tuma medida, ta nan mester trese e kambio for di e situashon aki.

Investigashon den e kaso aki ta kontinuá.