Corona vírus ku impakto nunka bisto

WILLEMSTAD.- E próksimo sorteo di bièchi ta posponé pa tempu indefiní, esaki ta prome bia den historia di bièchi di Kòrsou ku algu asina ta sosodé. Den pasado a yega di sosodé ku a posponé un sorteo pero un dia despues kaba por a duna otro fecha pa e sorteo. E bia aki e kaso ta diferente. Corona vírus realmente tin un impakto hopi grandi.

E desishon pa para e próksimo di bièchi di Kòrsou no tabata algu fásil. EXTRA a kombersá ku Tjasiara Allee relashonista públiko di Landsloterij kende a splika ku e situashon aktual,ku menasa di Corona vírus a obligá e organisashon di tuma medida. Sra. Allee a splika ku dia 2 di mei 2019 Landsloterij a posponé un sorteo pero pa siguiente dia mes a anunsiá ki dia ta tene e sorteo. Na 2019 a sosodé ku tabatin dianan di fiesta nèt prome ku e sorteo i rebendedónan mes a pidi si por posponé e sorteo ya asina nan por a haña mas tempu pa bende e bièchi. Tambe a yega di sosodé ku a posponé sorteo di bièchi pa menasa di orkan, pero ta e kaso awor aki si nunka no a yega di pasa prome.

Nunka prome landsloterij a yega di konfrontá un situashon di e índole aki.E siman aki tabata e prome dianan ku no tabatin bendementu di bièchi. Rebendónan ta komprondé e situashon pasobra den e kaso aki ta salu di hende ta hunga un ròl. Mayoria rebendedó ta hendenan di edat avansá, pues nèt e grupo di riesgo ademas nan tin ku atendé ku klientenan hopi serka pa atendé e benta i kambio i sèn etc. Tampoko no tabata responsabel mas pa permití aglomerashon di hende den sala na Landsloterij.

Na opinion di Tjasiara Allee, rebendedónan ta respondé bon riba e medidanan. Nan ta dependé di e benta komo fuente di entrada pero na momentu ta nan salu ta kore peliger. Finalmente el a indiká ku ta na Kòrsou so a stòp e benta, e otro islanan di eks Antia a sigui ku benta di bièchi, pero importante ta ku e sorteo ta posponé.