Aeropuerto internashonal di Kòrsou a risibí

WILLEMSTAD.- E promé buelo di TUI FLY for di Bruselas pa Aeropuerto Internashonal di Kòrsou a keda selebrá ku un saludo di awa den presensia di figuranan prominente i partnernan.

E buelo aki ta komienso di un trayekto di buelo nobo ku TUI a kuminsá for di e kapital belga. Entrante e luna aki tin buelonan for di Bruselas pa Kòrsou dos biaha pa siman, riba djamars i djasabra.

Arjan Kers Direktor Gerente TUI Bèlgika i Hulanda: “Tin un interes kresiente for di e merkado di Bèlgika pa Kòrsou i nos ke introdusí nos klientenan na tur e bunitesa ku Kòrsou tin pa ofresé. Ku nos buelonan for di Bruselas nos ta trese Kòrsou mas serka di nan. P’esei mi tin hopi konfiansa den e ruta nobo aki.”

E ruta nobo ta interesante tambe p’e turistanan belga. Aeropuerto di Bruselas ta un alternativa ekselente pa hulandesnan ku ta biba den e parti pariba dje pais, i naturalmente ta ofresé oportunidat tambe p’e komunidat di Kòrsou. For di awor kaba, nan por bula ku TUI no solamente pa Amsterdam pero tambe pa Bruselas.

15 buelo pa siman pa Kòrsou
Ku e buelo di Bruselas, TUI lo bula pa Kòrsou un total di 15 biaha pa siman entrante e luna aki; 13 biaha for di Aeropuerto Schiphol i 2 biaha for di Aeropuerto di Bruselas. E buelonan for di Amsterdam ta den kombinashon ku vários buelo (direkto) pa Aruba i Boneiru. For di Bruselas tin un eskala na Punta Cana (Repúblika Dominikana), e biahe di regreso semper ta ku un buelo direkto. Tur vuelo ta wòrdu operá ku un Boeing 787 Dreamliner. Abordo bo por skohe entre Ekonomia, Komodidat i Komodidat di asiento Deluxe.