WILLEMSTAD.- Polis a pone man riba e promé sospechoso den e kaso di asesinato di e hóben di 18 aña, di djasabra pasa dia 3 di yüli den Kaya Berom.

Polis ta informá ku e siman aki e tim di investigashon di kasonan di homisidio konhuntamente ku e tim di aresto a detené e hòmber S.G.N. di 18 aña di edat, nasé na Kòrsou, relashoná ku e kaso ariba menshoná.

Detenshon di e sospechoso a tuma lugá na un adrès na Noord Zapateer. Seguidamente a hasi un entrada hudisial den un kas na Kaya Mafalda Salsbach Minguel, kaminda a konfiská un telefòn.

Manera ta konosí, djasabra dia 3 di yüli último tabatin un tiramentu na un kas den Kaya Berom kaminda un persona a resultá herida. Polis ku a yega na e sitio a topa un hòmber drumi abou i ku herida di bala. E no tabata duna señal di bida.

Ambulans ku tambe a presentá na e sitio no por a hasi nada mas pa e víktima i dòkter di polis a konstatá morto. For di investigashon ku polis a hasi, a resultá ku e víktima, e hóben   Trevor Welvaart di 18 aña tabata na e kas ei den Kaya Berom serka algun hende. Dado momentu algun persona lo a pasa i los dirigí, ku a kue e víktima parti ariba di su kurpa i kousa su morto.

EXTRA a  komprondé ku ta sospecha ku ta un problema e hóben aki lo tabatin na un sitio di ambiente i ku esaki lo por a kondusí na e tiramentu. Tantu e víktima komo e sospechoso tur dos tin 18 aña. Polis no ta ekskluí e posibilidat ku mas detenshon lo kai den e dianan benidero. E sospechoso miéntras tantu a keda enkarselá pendiente mas investigashon.