WILLEMSTAD.- Segun minister di Salubridat, Medio Ambiente I Naturalesa Zita Jesus-Leito COVID-19 lo sigui pidi atenshon den aña 2021. ‘Esaki no ta nifiká si ku nos mester pèrdè otro aspekto di nos poblashon, pa loke ta trata nan salú i medio ambiente i naturalesa for di bista. Nos lo na hasié tampoko.’
Minister a bisa ku nos hospital nobo, CMC, a hasi un aña operashonal kaba. ‘Gobièrnu a logra di finalisá i entregá e “business case”. Esaki ta tokante e parti di presupuesto pa kuido, ku yama ‘zorgbudget di CMC’. Segun minister esaki sinembargo ta keda punto di atenshon.
‘Pa fortalesé ‘eerstelijnszorg’ i hasi kuido mas alkansabel e promé huisartsenpost lo keda establesé na CMC na komienso di 2021. Intenshon ta pa despues sigui ku mas ‘huisartsenpost’ na lugánan stratégiko, manera Bándabou i tambe Bándariba.’
Jesus-Leito: ‘Ministerio di Salubridat, Medio Ambiente i Naturalesa a keda fortalesé i kuminsá yena parti di e asina yamá ‘kritische functies’. Di manera ku ministerio ta mihó akapará pa realisá e tareanan manera ta stipulá den lei.’ Pa e manera aki Ministerio di Salubridat, Medio Ambiente i Naturalesa por monitoriá e direkshon di reformanan den kuido.
Jesus-Leito a splika ku tambe tin palabrashonnan andando ku ministerio di relashonnan Eksterior di Hulanda ku lo pone mas atenshon pa spesialmente e área di salú preventivo den trayekto di COHO, ku ta e Organo pa Reforma i Desaroyo Karibense, i tambe e landspakket.
Manera ta konosí gobièrnu di Kòrsou resientemente a firma akuerdo ku Hulanda tokante COHO. Pa e próksimo seis añanan lo tin di duna kontenido i ehekutá e programa di COHO (Caribisch Orgaan voor Hervorming en Ontwikkeling). E Organo lo ta hinká den un bachi legal, e lo bira un lei di Reino, loke ta mara gobièrnunan pa kumpli kuné na bienestar di e komunidat di Kòrsou.