WILLEMSTAD.- Minister di Salubridat, Medio Ambiente i Naturalesa Zita Jesus-Leito durante konferensia di prensa di 5 di aprel a bisa ku tur persona interesá pa risibí un vakuna por haña nan promé prek promé ku fin di aprel. Pa yega na esaki gobièrnu di Kòrsou lo habri mas lokalidat di vakunashon, entre otro na SDK, riba término kòrtiku. Segun Jesus-Leito e interes di pueblo di Kòrsou pa haña un vakunashon ta inmenso. E ta splika ku Kòrsou awor ta konosé dos trayekto, ku ta kana pareu. Un trayekto ta pa kombatimentu di COVID-19 e otro trayekto ta di vakunashon. ‘Situashon na CMC ta hopi serio. Nos a pidi Aruba pa yuda nos ku algun di nos pashèntnan. Aruba a bai di akuerdo. I nos ta gradisí Aruba pa nan a duna un man.’ Mas aleu Jesus-Leito a bisa ku gobièrnu ta traha duru pa amplia kuido. ‘Tur médiko yegando for di eksterior ta traha duru pa skapa bida di nos hende.’ E ta gradisí tur hende ku ta yuda Kòrsou den e lucha kontra COVID-19. El a menshoná spesialmente Hulanda.
Segun dr. Jerry Semper, ku tambe tabata presente durante e konferensia di prensa, den e último dianan Kòrsou a vakuná diariamente un kantidat di mas ku 2000 hende. E ke yega na un kantidat di entre 7000 i 9000 persona pa dia ku por wòrdu vakuna. Pa asina kumpli ku e intenshon pa tur hende ku ta interesá pa haña un vakunashon por haña esaki promé ku fin di aprel.