WILLEMSTAD.- Promé minister Gilmar Pisas ayera a bishita playa di Caracasbaai. E tabata kompaña manera EXTRA a tuma nota di kolaboradónan di GMN. E siman aki EXTRA a relatá e dekadensia na e playa di Caracasbaai. Un playa kaminda hopi hende lokal i turista ta bishita i un di e poko playanan fásil aksesibel pa tur, kaminda famianan por topa otro, por tin enkuentronan di amigunan ets ets. Pero e situashon ta laga di deseá na e playa aki.
Bou di e post di EXTRA riba Facebook promé minister a bisa “Shonnan trankilo nos ta drecha tur kos. E kosnan ta hopi pa atendé. E sèn ta pone ei pero tempu no ta duna pa nos start manera antisipá. Nos ta keda kla si. Temporalmente ta manteniendo nan. Caracasbaai nos ta pone mas o ménos pa ora aña habri nos atendé nan”. Tambe prome minister a bai pone su mes na altura di e plan general di Caracasbaai. I ayera promé minister a bai Playa di Caracasbaai i EXTRA a kapta e imágennan aki.
