WILLEMSTAD.- Promé Minister Gilmar Pisas a risibí e Kònsùl di Italia establesé na Maracaibo (Venezuela) Dr. Aniello Petito dia 4 di febrüari 2022. Kònsùl Aniello Petito tabata kompañá pa Kònsùl Honorario di Italia na Willemstad, sra. Kathryn Pruneti.

E bishita tabata unu di kortesia kaminda Kònsùl Aniello Petito por a sera konosí ku Promé Minister.

Durante di e bishita a elaborá riba diferente tema manera trabou na Venezuela i Kòrsou i relashon komersial entre Italia i Kòrsou, Refineria i Turismo.

Despues di vários aña un hefe di mishon na Maracaibo ta bishitá Kòrsou pa atendé ku e komunidat italiano residensiá aki i sera konosí ku outoridatnan lokal.

A konkluí e bishita ku promesa di mantené un kolaborashon estrecho entre e dos paisnan. Kònsùl Petito lo sigui su mishon na Aruba djadumingu awor ku e mesun meta i a primintí di bishitá e tres islanan ku ta pertenesé na hurisdikshon di Maracaibo ku mas frekuensia.

E bishita a kana den un esfera hopi positivo.