WILLEMSTAD.- Promé Minister Gilmar Pisas tabata presente na selebrashon di Dia di Sint Willibrordus, organisá pa Fundashon Desaroyo Sint Willibrordus. E evento a tuma lugá den un ambiente di union i orguyo lokal, kaminda tambe Selikor a selebrá su 30 aña di eksistensia.
Den su diskurso, Promé Minister a ekspresá su gradisimentu di kurason na Fundashon Desaroyo Sint Willibrordus pa e dedikashon kontinuo pa mantené e komunidat bibu, fuerte i uní. E la indiká ku Sint Willibrordus ta mas ku un bario: “E ta un komunidat ku su mes alma, ku amor di su abitantenan pa otro.”
Durante di su diskurso, Promé Minister Pisas a anunsiá dos notisia importante pa e komunidat di Sint Willibrordus: E Kaya ku ta konektá Bullenbaai ku Banda Bou pronto lo wòrdu asfaltá, pa mehorá aksesibilidat i mobilidat den e área. Tambe ku Gobièrnu di Kòrsou a transferí un montante di Cg.100.000 riba kuenta di Misa di Sint Willibrordus pa kontinuá ku e renobashon di e misa, komo un kontribushon simbóliko pa preservá e herensia religioso di e bario. E a hasi tambe un apelashon na otro instansianan i persona di bon boluntat pa yuda ku nan aporte finansiero, pa e proyekto di renovashon por sigui ku e dignidat ku e meresé.