WILLEMSTAD – Promé Minister Sr. Eugene Rhuggenaath ta duna e siguiente deklarashon relashoná ku komentario di Sr. van Putten, miembro di Konseho Insular di St. Eustatius dia 9 di òktober último.

"Mi ta lamentá i ta denunsiá kategorikamente e palabranan violento ku Sr. van Putten, miembro di Konseho Insular di St. Eustatius a ekspresá djaluna dia 9 di òktober aki na Kòrsou. Komo un estado di derecho den reino, polítikonan i representantenan tin netamente e responsabilidat pa kondená violensia. Pa mi reiterá lokual mi a bisa den mi spich dia 10 di òktober: diferensia di opinion i pensamentu ta sano. Tur persona i gruponan tin derechi pa reuní i tene kombersashon riba e tema di outonomia. Mi ta apoyá esei basta e tuma lugá den esfera pasífiko i konstruktivo. Lokual si mi ta rechasá di tur forma ta ora ta promové uso di violensia."