WILLEMSTAD.- Riba rotònde Ergilio Hato na Otrobanda den futuro lo lanta un monumento komo homenahe na un di e deportistanan mas grandi ku Kòrsou a konosé: e gran portero Ergilio Hato.

Den ambiente di pashon i orguyo ku nos ta bibando awor ku Blue Wave, i pa pone énfasis riba nos historia riku di futbòl, djabièrnè awor pa 10’or di mainta lo pone e promé piedra pa e konstrukshon di e monumento aki.

Portero di e selekshon aktual di Blue Wave, Elroy Room, huntu ku Minister di Enseñansa, Siensia, Kultura i Deporte, Sr. Sithree van Heydoorn.

E monumento ta un rekordatorio permanente na Ergilio Hato, ku e aña aki lo tabata selebrando su di 100 aña di nasementu. Na mesun momentu e ta simbolisá e historia riku di futbòl di Kòrsou i e relashon entre nos herensia deportivo i éksitonan ku nos ta mira awe.

Ku e akto simbóliko aki, Gobièrnu di Kòrsou, Fundashon Amigunan di Ergilio i Fundashon Orilio, Pantera Negra no solamente ke honra un di nos héroe deportivo mas grandi di nos isla, pero tambe enfatisá ku e logronan grandi ku Blue Wave a alkansá ta basá riba trabou, lucha i legado di héroe- i pioneronan ku a bai nos dilanti.

E monumento ta un diseño di nos artista Giovanni Abath.

Gobièrnu di Kòrsou, Fundashon Amigunan di Ergilio i Fundashon Orilio, Pantera Negra huntu ta enkargá ku ponementu di promé pieda, komo un tributo na un leyenda ku a inspirá generashonnan kompleto.