Servisio meteorológiko lo vigilá e situashon di tempu

WILLEMSTAD. - Konforme e promé mensahe klave di Servisio Meteorológiko Kòrsou pa loke ta trata e temporada di orkan 2021, nan ta informá ku ayera mainta tin un área di preshon abou situá na un distansia di mas o ménos 1500 kilometer ost di e isla Bermuda i ku ta move den un direkshon wèst. Aktualmente e sistema aki tin 70% chèns pa sigui desaroyá i bira un siklon Sub-Tropikal. Na momentu ku e sistema aki bira un siklon, lo e haña e nòmber Ana, ku ta e nòmber di e promé siklon pa lokual ta trata e temporada di orkan 2021. Na e momentunan aki, e sistema no ta formando un menasa pa islanan ABC.

Ta pronostiká ku aktividat di siklonnan tropikal durante e periodo di orkan 2021 den region Atlántiko lo bai ta mas aktivo ku e averahe pa temporada di 1991-2020.

E perspektiva aktualisá pa temporada di orkan 2021 ta indiká ku lo por tin 17 sistema ku lo haña nòmber di kua 8 lo forma den un orkan di kua 4 lo por bira orkan fuerte. Pa e temporada aki tin 21 nòmber di orkan registrá.

Servisio Meteorológiko Kòrsou ta menshoná ku nan ta kla prepará pa periodo di Orkan 2021.