WILLEMSTAD.- Loteria nashonal Landsloterij a sòru ku Kòrsou a habri aña ku hopi hende kontentu, den sentido ku nan situashon finansiero ta mas bunita. E Promé premio di e sorteo mionario di Promé di yanüari 2019 a kai riba 12398. E di dos premio a kai riba 7188 i e di tres premio a resultá 12181. E bia aki tur tres premio grandi a kai na Kòrsou, asina Landsloterij a informá EXTRA.

Wega di bièchi ta forma parti di un tradishon den nos komunidat i sigur na kambio di aña hopi hende ta purba nan suerte. Sra. Allee di Landsloterij a splika ku pa loke ta trata e sorteo mionario di Promé di yanüari 2019 e benta a keda igual na añanan anterior. A logra bende mas ku 20 mil for di e 35 mil numbernan ku ta den wega. Ta bende bièchi na tur e islanan di eks Antia i den pasado premio mayó a yega di kai riba e otro islanan. Kòrsou ta e merkado mas grandi. E aña aki tur e tres premionan prinsipal a kai na Kòrsou.

Pa loke ta trata e kambionan ku a organisashon a hasi den su skema di premionan, esta e kambio pa premionan derivá, e funshonario a duna di konosé ku komunidat a aseptá e kambio hopi positivo. Kumpradónan tabata kontentu ku e kambio i meskos e rebendedónan ku a mira e reakshon positivo di Kumpradónan. Tabata un kambio ku pa basta tempu rebendedónan i Kumpradónan tabata pidi esaki.

E próksimo sorteo ta 17 di yanüari 2019. Pa e aña aki Landsloterij lo tin 4x sorteo di 1 mion florin, 7 sorteo di mei mion i 11 sorteo di 200 mil florin na premio.