WILLEMSTAD.- Por bisa ku un un promedio di 84% di studiantenan ku mester a repasá un òf mas materia di eksámen, loke nos ta yama “her”, a slag finalmente. Esei di akuerdo ku e resultadonan ku EXTRA a risibí di e Ministerio di Enseñansa, Siensia, Kultura i Deporte.

Segun e informashon dje ministerio menshoná, pa loke ta VSBO un kantidat di 342 studiante na nivel di PBL a repasá nan eksámen, di kual 296 a slag, ku ta bon pa 87%. Na nivel di PKL un kantidat di 397 a repasá i 354 a slag, ku ta bon pa 89%. Pa loke ta e nivel di TKL no ménos ku 569 repasá i 454 a slag, ku ta bon pa 80%.

Pa loke ta e studiantenan na nivel di Havo-5, un kantidat di 447 a repasá nan eksámen, di kual 353 a slag, loke ta bon pa 79%.

E kantidat di mas tiki a repasá na nivel di VWO, ku ta 149, i finalmente 127 a slag, ku ta bon pa 85%. Asina pues por bisa ku un 84% di studiantenan ku a repasá nan eksámen, pues ku a bai e di dos tanda a slag.

Di akuerdo ku e resultadonan aki, si tin di kompará e promé tanda ku e di dos, na nivel di VSBO PBL, den promé instante 82% a slag i 87% den di dos tanda. Na nivel PKL e tabata respektivamente 81% i 89%; TKL tabata respektivamente 69% i 80%. Na nivel di Havo e resultadonan tabata di respektivamente 65% i 79%. Na nivel di VWO esaki tabata 74% den promé tanda i 85% ora di “her”.