WILLEMSTAD.- Fundashon Pro Monumento ta organisá djadumingu awor un Monumento Habrí den área di Rif den Otrobanda. Pa motibu di e pandemia di Covid no tabata posibel pa organisá eventonan grandi den e último añanan. Ku ta nifiká ku awor, despues di 5 aña, ta bin un Monumento Habrí atrobe. Esaki den kuadro di selebrashon di 25 aña patrimonio mundial di UNESCO di Willemstad.
Dia 4 di desèmber 2022 ta selebrá ku Willemstad ta Patrimonio Mondial di Unesco ya 25 aña kaba.
Den kuadro di Monumento Habrí lo tin mas o ménos 32 edifisionan habrí entre 10:00 or te ku 18:00 or pa públiko.
Esaki ta e di 12 Monumento Habrí ProMo ta organisá for di su lantamentu na 1993. Riba e dia tambe tin eksposishon di arte i aktividat edukativo pa muchanan. Tambe lo tin músiko riba e ruta.

Presidente di Fundashon Pro Monumento, Dennis Klaus, ta kontentu ku awor lo tin un Monumento Habrí atrobe. E ta bisa ku tur hende ta bon biní pa bishita área di Rif. ‘Lamentablemente no tur monumento ta den bon estado. Den e último 25 aña nos a logra basta. Tin hopi monumento na Kòrsou ku ta den bon estado, danki tambe na e trabou di Monumentenzorg. Pero te ainda tin monumento ku ta den mal estado.”
Klaus ta menshoná ku aña pasá edifisio di La Moda di Paris a kai den otro, den e wikènt último un otro edifisio den área di Rif a kai den otro, pa motibu di hopi awa seru ku a kai den e último simannan. Pero esaki no ta e úniko motibu, segun Klaus; edifisionan den Gasthuisstraat i Spaansestee tabata den mal estado kaba.

Resientemente Hulanda a pone 10 mion euro disponibel pa konservashon di monumento na Hulanda Karibense. Segun Klaus restourashon ta hopi kostoso. E ta spera ku un parti di e 10 mion euro por wòrdu usa na Kòrsou. ‘Kompará ku e otro islanan Karibense di Reino Hulandes nos tin hopi monumento; tur kontribushon ta bon biní.”