WILLEMSTAD.- E promotor/ komersiante G.M. (42)  huntu ku e akusado femenino C.D.(21) tabata den sala di korte akusá pa transportashon di droga dia 28 di sèptèmber último, ora ku nan tabata bayendo Hulanda.

Ambos ta keda akusá di kier a eksportá 480 i 235 gram di koka den deodorante. Tur dos tabatin dos deodorante, kada un ku droga hinká den nan maleta. Tur dos a aseptá ku nan tabata transportando droga.

E akusado femenino a bisa, ku e dia ei nan dos tabata bayendo Hulanda pa salú  G.M., e ta sufri di suku.

Segun e akusado femenino, riba e dia enkuestion, e ku su ruman hòmber a pasa buska G.M. pa bai Hato. Den  outo G.M. a pidié ku e por dun’é un tiki “Body splash”. El a duna G.M. e yabi di su maleta, pa e saka e “body splash”. Despues di a kaba di pasa kontròl na duana, nan a kai sinta pa warda momentu pa subi avion. Direpente dos duana a aserká nan i bisa nan pa bai ku nan.

E akusado femenino a sigui konta ku ora nan a yega abou,  e duana a habri su maleta i saka dos kondon na pasta for di kada un di e dos deodorantenan, for di su ekipahe, ku a forma e 235 gram di koka.

Ayera el a bisa ku e no tabata sa nada di e deodorantenan. Segun C.D. e ta kere ta ora G.M. a tuma e yabi pa saka e “body splash”, el a pone e deodorantenan den su kosnan di uso.

El a sigui konta ku ora nan a haña dagfar i por a bai kas, G.M. a top’é riba kaya ku su amiga i a kuminsá persiguí nan. Segun C.D., G.M. a keda pidié pa su droga  i el a bisa G.M. ku e mester bai duana bai tuma e droga. Despues di esaki, el a yama polis ku a yega i detené G.M. na e sitio.

Hues a bisa e akusado femenino, ku na duana el a bisa ku ta mainta G.M. a dun’é e deodorantenan i p’esei e ta keda straño, kon e ta bisa ku e no sa nada di e deodorantenan.

Fiskal a haña e akusashon kompletamente probá i a bisa ku e ta konvensí ku e akusado tabata sa di e transportashon di droga. Mirando esaki fiskal ta tene kuenta ku e ta “first offender”, e kantidat di droga ku tabata na pasta i ku mester kita 40% porshento. Fiskal a yega na 8 luna di kual 4 kondishonal ku un periodo di prueba di 3 aña. E akusado femenino ku no a presentá ku un abogado, a bisa awa na wowo ku e tin apénas 21 aña i ta mama di dos yu. El a bisa ku e no a influensia G.M. manera el a deklará, pasó e ta mas chikí kuné. Despues ku hues a bai deliberá, el a bisa di ta haña e akusashon probá, pero ta desviá for di e demanda di fiskal. Mirando esaki hues ta yega na un kondena di 4 luna di kual 2 kondishonal.