44.1 mion pa pago salario empleadonan públiko!

WILLEMSAD.-Un informashon ku gobièrnu a kompartí ku partidonan di interes ta mustra ku ta pronostiká ku na final di e aña aki gobièrnu lo mester konta ku mas ku 400 mion florin ménos na entrada. Si e pronóstiko inisial pa 2020 a indiká ku lo por a konta ku 1570 mion florin, awor teniendo kuenta ku e.o Covid e pronóstikonan aki no ta surpasá 1.164 mion pues mas ku 400 mion ménos.

Un bista riba e sifranan di e promé seis lunanan di e aña aki a mustra un kaida basta fuerte pa loke ta trata entrada di gobièrnu. Na yanüari 2020 e entrada tabata manera pronostiká, miéntras ku na febrüari por a kuminsá sinti un kaida di 27.9 mion ménos. Na mart e kaida tabata di 52.9 mion ménos na entrada i na aprel e kaida tabata di 20.9 mion ménos. Na mei e kaida a krese bastante atrobe te 43.3 mion i na yüni e kaida a yega 28.6 mion ménos.

Konforme informashon ku e kolegio di supervishon finansiero CFT a presentá por nota ku nan ta sali for di e punto di salida ku na final di 2020 Kòrsou lo tin un défisit di 687 mion florin. Esaki prinsipalmente debí ku ta konta ku kaida di entrada lo sigui oumentá debí na Covid.

E suma aki ta ménos ku loke ministerio di finansa a kalkulá di 568 mion. Den e kalkulashonnan aki a tene kuenta ku e medidanan pa mantenshon di kupo di trabou di empresarionan sin personal i tambe esnan ku ta haña NOW pa sigui tene nan trahadónan na trabou.

Gobièrnu ta tene kuenta ku un suma di alrededor di 44.1 mion tur luna pa pago di salario di su empleadonan. Esaki lo ta enserá e salario brutu kombiná ku otro primanan sosial, asina e FMR rapportage ta indika.