WILLEMSTAD.- No ta algu deskonosí ku tin un skarsedat grandi pa polis den Kuerpo Polisial di Kòrsou. Motibu prinsipal di esaki ta e kantidat di miembronan ku ta ousente pa diferente motibu.

Tin ku a haña nan ku problema ku hustisia i ta será, otronan riba nòn aktif i tambe vários ku ta malu.

E echo ku tin skarsedat di personal ta pone ku polisnan ta trahando hopi ora èkstra pa asina garantisá òrdu i asistí kaminda mester. Tambe Kuerpo Polisial ta risibiendo sosten di e.o VKC i Milisia.

Hefe di Kuerpo Sr. Jules Ilario a konfirmá pa EXTRA ku ya Kuerpo Polisial di Kòrsou a manda lista di posishonnan ku mas tin mester pa por haña aprobashon di gobièrnu.

Awor ta keda na Gobièrnu i Ministerio di Hustisia pa aprobá e lista pa asina por saka e vakaturanan di forma ofisial. Ora Gobièrnu pone e fondonan disponibel por ranka sali, asina sr Ilario a bisa EXTRA. Miéntras tantu kuerpo mester funshoná manera por, te dia ku nan keda aliviá un tiki ku mas polis pa kumpli ku e trabounan ku komunidat ta rekerí.