Otro siman lo inventarisá kuantu Pfizer a sobra:

WILLEMSTAD. - Den un komentario pa redakshon di EXTRA, dr. Jerry Semper a splika ku denter korto lo por kuminsá vakuná muchanan di 16 pa 18 aña ku riesgo médiko haltu. Esaki ta dependé di kuantu vakuna di Pfizer a sobra aki na Kòrsou.

Dr. Semper a splika ku dia a kuminsá aki na Kòrsou ku vakunashon, t’asina ku a kuminsá vakuná hendenan di edat i di riesgo haltu. Awor aki e reto ta pa e grupo di 16 pa 18 aña di riesgo médiko haltu.

Otro siman lo inventarisá kuantu Pfizer lo sobra, despues ku kaba di vakuná tur hende ku mester a risibí nan di dos bakuna di Pfizer. E ora ei lo kuminsá yama e muchanan di edat entre di 16 pa 18 aña di riesgo médiko haltu pa vakuná.

Dr. Semper ta di opinion ku riba un poblashon chikí manera Kòrsou e grupo aki lo no ta haltu.

Aktualmente tur Pfizer ku tin, ta pa kubri tur ku a haña nan promé vakuna, pero manera esei ta kla, ku lo ta den transkurso di e siman benidero, lo kuminsá ku e muchanan manera ariba menshoná.

Pa loke ta trata e vakuna Moderna tambe a entregá nan aprobashon pa muchanan bou di 18 aña, pero esei ainda su aprobashon no ta kla. Pero denter korto Moderna tambe lo ta dje leu ei.