WILLEMSTAD.- Na okashon di presentashon di sédula nobo, minister Ornelio Martina ta mustra ku pronto por usa esaki pa biaha entre islanan di èks Antia.

Na okashon di presentashon di e sédula nobo, minister martina a kalifiká e akto ei komo unu históriko pa loke ta trata desaroyo di nos identidat.

Despues di 11 aña ku Kòrsou a bira pais outónomo den Reino, Kòrsou ta introdusí su sédula ku ta karga nos propio identifikashon. Aparte di e aspekto emoshonal importante akí, e sédula nobo tin benefisio práktiko ku lo fasilitá biahamentu entre Kòrsou i nos islanan ruman di èks Antia Hulandes.

“Permití mi felisitá e tim bou di maneho di Sra. Haddocks pa e bon trabou ku nan a realisá, pa awe nos sédula nobo por a bira un realidat. Tambe mi ke gradisí henter e tim pa e tremendo esfuerso ku nan ta hasi pa tur dia di nobo mehorá e servisio akí na Kranshi. Manera mi a menshoná, nos tarheta di identifikashon nobo ta karga nòmber i identifikashon di Kòrsou”, minister Martina a bisa durante di presentashon di e sédula nobo.

E sédula ta kontené e film holográfiko, meskos ku e tarheta di reibeweis aktual. Un adelanto sigur ta e asina yamá “Machine Readable Zone” patras di e karchi, ku ta un banchi ku informashon kodifiká, den e mesun estilo ku nos pasport.  Esaki ta brinda e posibilidat pa den futuro serkano, e siudadano su informashon keda lesá elektrónikamente ora e biaha pa nos hermano islanan.

Minister a bisa ku a opta pa solamente ahustá e diseño di e sédula nobo, en bes di introdusí un diseño kompletamente nobo. Un di e motibunan ku a skohe pa esaki ta pasobra ahustá e diseño tabata ménos kostoso. Netamente esaki tambe ta pas den e espíritu di e tempu ku nos ta biba aden aktualmente.

Segun minister Martina, e paso ku a dal ei ta parti di nos herensia, ku a kuminsá na aña 1965 ora nos a introdusí un tarheta di identidat pa siudadanonan di Antia Ulandes.

Riba 23 di Mei 2002 a introdusí e sédula ku tamaño di un tarheta di krédito. Na mes momentu a hasi e periodo di balides 5 aña en bes di 10 aña. Promé ku e tempu ei, e siudadano mester a bini ku su mes pasfoto na momentu ke e mester a laga traha su sédula.  Ku introdukshon di e sédula na 2002, e parti ei a keda adaptá. Kranshi mes a kuminsá saka e pòrtrèt.

26 di yüli 2021, ta dal un paso mas den desaroyo di nos tarheta di identifikashon.

For di ayera, tur siudadano ku mester risibí un sédula, ta risibí un sédula nobo.