WILLEMSTAD.- Centrum Supermarket tin 33 aña di eksistensia i semper nan a perkurá pa brinda komunidat di Kòrsou ku produktonan di bon kalidat. Un supermerkado ta un empresa ku tin algun mil produkto, tur dia tin produkto ku ta kaduká den un supermerkado, asta ta asina ku tin produkto ku ta yega Kòrsou kaduká. Centrum no ke bende niun produkto kaduká i ta kita tur for di rèki. E video ku a bai rònt den dianan tras di lomba ta produkto di un akto premeditá pa kousa daño. Ta un trahadó, kontra tur regla di e empresa, a plak etikèt riba otro i despues a laga un amigu di dje graba i pone esaki riba facebook. Na tur kliente; E instrukshon na tur trahadó di Centrum ta ‘loke abo no ta kome, bo no ta bende’. Na palabra Enrique Ribeiro propietario di supermerkadonan Centrum ku e siman aki a haña bishita di e tim di MEO pa un kontròl rigoroso despues di un video riba retnan sosial ku tabata mustra keshinan ku a pasa fecha den e establesimentu.

Segun Riberio,  supermerkadonan Centrum ta hasi hopi na limpiesa i higiena. Ademas nan ta paga kompania independiente pa kontrolá higiena, nan ta instruí tur trahadó, p’esei tambe ku asta nan depósito semper ta limpi meskos ku nan departamentu ‘pre-pack’. Algu a sosodé  i esaki tabata algu deliberadamente. E trahadó (hende muhé) lo tabatin problema ku un kolega i gerensia a atendé e kaso, pero ta parse ku e señora a keda ku rabia i a echa e negoshi un baina aki. No a dura muchu pa gerensia a saka afó ku ta e trahadó enkuestion ta esun ku a echa e baina.  E hòmber ku a hasi e grabashon tambe ta konosí pa gerensia.

E propietario ta lamentá e aktitut destruktivo ku ta biba awendia na Kòrsou. E ta lamentá mas ainda kon MEO i e tim a reakshoná i sera ámbos supermerkado mesora. E no ta di akuerdo ku esei. Den kombersashon ku funshonarionan di gobièrnu Ribeiro a komprondé ku ta òrdu a bini ‘di ariba’ pa tene kontròl rigoroso despues di loke a sali riba retnan sosial.

E propietario a sigui bisa ku e ta lamentá pasobra ta bon konosí ku Centrum ta sòru pa trese bon produkto sinembargo tòg ta aktua riba un akto di revancha di un empleado. Ta mas ku 500 trahadó tin den e empresanan. E akshon aki a sòru pa un pèrdida inmenso pa e establesimentunan.  E sistemanan di kontròl tei kaba pa ámbos supermerkado, pasobra kontròl di kalidat i higiena di loke ta ofresé komunidat ta di hopi balor pa e kompania. Finalisando Enrique Ribeiro a keda enfatisá ku su lema ta ‘loke bo no ta kome, bo no ta bende. Ademas atendé ku kuminda meskos ku ta pa bo mes kome”.