WILLEMSTAD.- Korte di promé instansia ayera a posponé kaso di G.F. (41) akusá pa estafa di vários persona.
E ta keda akusá ku den e periodo di desèmber 2012 te ku ougùstùs 2015 el a estafá un kantidat di 8 persona un total di 189 mil florin na tur. E tabata gaña su víktimanan ku e tabata hür òf bende terenonan na Klein Sint Michiel, Boca Sami, Tera Kora i Cabo Verde.
E tabata hasié na nòmber di “Freeland Properties (& Productions)”, dor di bisa e personanan ku e ta outorisá pa reservá tereno a kambio di un montante di plaka ku mester wòrdu pagá i ku benta di e terenonan no mester di notario.
Mas aleu e akusado tabata mustra esnan ku ke kumpra un tereno un karta di outorisashon, kaminda ta laga parse ku e kompania “Freeland” ta outorisá pa bende kavelnan na nòmber di e doño di e tereno original di kual esei no tabata e kaso.
Tambe e tabata duna nan un bista kon tur kos lo wòrdu reglá a base di e kompania i tambe a mustra e kontrato di hür i òf benta di tereno.
E akusado ta den libertat aktualmente pendiente pa tratamentu di su kaso.
Debí na e medidanan di COVID ku Gobièrnu di Kòrsou a stimulá, korte di promé instansia no por a trata e kaso. E kaso a keda posponé pa un tempu indefiní.