WILLEMSTAD.- Propietario di “Rijdende Honden wassers” R.M. (29) a presentá den sala di korte akusá pa dos delito penal.
Segun e akusashon, e ta keda akusá di a kue outo di un dama i bai kuné.
Pa loke ta trata e di dos akusashon, e ta keda akusá di a tira algun kos riba e víktima ku a resultá di tabata paresido di un “molotov cocktail” i a menasá nan ku e ta kima nan bisando “mihó bosnan bai fo’i aki nan sino mi lo sende bosnan na kandela”.
E akusado ku ta enkarselá a presentá den sala pa responsabilisá su mes pa su akto.
El a splika ku el a kue e outo di e dama den beslag, pa motibu ku e dama ta biba den un flèt di dje i tabata debe.
Pa loke ta trata e tiramentu di kosnan paresido na e molotov cocktail, e akusado a bisa ku niun momento so tabata su intenshon pa tira e tipo di kosnan ei.
El a bisa ku e no tabata sa mes kiko ta un molotov cocktail. E tabata rabiá pasó e dama tabata debe. Na momento ku polis a intermediá, el a duna e dama su outo bék sin niun daño.
Pa loke ta trata e menasa di sende na kandela, el a bisa ku esei no ta kuadra manera e dama a splika. El a bisa ku e dia ei durante diskushon e dama a mand’é ku un piedra i kibra su telefòn. A surgi un bringamentu di kua e dama a haña heridanan leve na su kabes.
El a trata na defendé su mes di un manera òf otro.
Fiskal a haña e akusashon probá i a demandá e akusado na 15 luna di kual 3 kondishonal.
Abogado di e akusado mr Dickens a splika ku e akusado ta adikto na droga i ta dispuesto pa haña yudansa profeshonal. E tin sosten di su ruman i tambe di su tata.
Tambe e abogado a splika ku mr Pinedo ku ta un profeshonal ku eksperensia den resosialisashon riba e tereno di adikshon na droga, alkohòl i “gamble” ta kla pa yud’é i gui’é. E tratamentu tin un durashon di 9 luna.
P’esei e ta pidi hues pa tene kuenta ku e ta “ first offender” i tambe ku e ta dispuesto pa haña yudansa.
Hues den su desishon a kondená e akusado na 270 dia di kual 98 kondishonal i tambe a ordená ku manera e sali prizòn e bai Brasami pa e tempu ku ta nesesario pa e rehabilitá.