WILLEMSTAD.- Ayera durante  “Covid Zitting” propietario di trùk di pan “Hisa dede Mobil“ tabata awa na wowo ora el a tende e tin ku paga 1500 florin di but pa falta di inkumplimentu ku e orario ku gobièrnu a stipulá relashoná ku COVID.

Segun e prosèsverbal e tim multidisiplinario a yega na e trùk di pan kuartu pasá di 8 di anochi i ainda e lugá tabata habrí.

E señora Vrutaal propietario di e trùk di pan a bisa ku e dia ei ta su trahadónan tabata presente.

Nan a bis’é ku e trùk tabata sera promé ku 8 or.

Tabatin klientenan ku a yama na telefòn i mester a kaba tuma nan kuminda. Un di e trahadónan ku tabata sintá den sala a bisa ku pa kuartu pa 8 e trùk tabata será kaba.

Hues a bisa e señora si el a paga e 1500 florin na “Paga bo but “ e lo no mester a presentá dilanti hues.

E señora a bisa mirando e tiki orario ku nan tin pa bende, e no por paga e but pasó e tin asta un areglo ku belasting kaba. P’esei el a bin korte pa e wak si hues por yud’é.

Fiskal Awadhpersad a duna di konosé ayera ku e no tin motibu pa no kere e agentenan pasó nan ta persona ku a huramentá pa traha prosèsverbal.

Mirando esaki fiskal ta hasi demanda di 1500 florin di but pa Vrutaal.

Ora hues a puntra e dama si e tin algu di bisa, e dama a kuminsá yora i a opta pa e no bisa nada mas.

Hues a tene kuenta ku e situashon di e dama i a dun’é un but di 1500 florin di kual 750 kondishonal.