Mundu polítiko di Kòrsou ta sigui esaki ku interes

W’STAD/ORANJESTAD.- Segun partido polítiko arubiano Accion 21 mester eksihí edukashon na nivel HBO pa bira minister. Awe parlamento di Aruba lo trata e último konsepto di e lei di integridat pa kandidatonan pa nominashon komo minister. Accion21 lo proponé un amienda ku nan ta spera di lo konta ku sosten di tur frakshon, pa saneá e defisiensianan den e konsepto di lei aktual. Un di e proposishon ta ku ta establesé un nivel mínimo di HBO pa por nominá komo minister.

Manera EXTRA ta komprendé for di kombersashonnan ku diferente polítiko na Kòrsou den e último dianan diferente  polítiko a papia tokante e tópiko kaba. Algun di nan ta na fabor di e proposishon di e partido polítiko nobo Accion 21. Den general por bisa ku for di mundu polítiko na Kòrsou ta wak e desaroyo na Aruba ku interes. Pa motibu ku awe parlamento lo trata e último konsepto di e lei di integridat pa kandidatonan pa nominashon komo minister. Ta trata di un lei relashoná ku integridat di ministernan. Den e lei ta indiká kiko un minister por hasi i kiko e no por hasi. Segun parlamento di Aruba ta importante ku awor ta skirbi pretu riba blanko kiko komunidat di Aruba, i tambe parlamento, por spera di un minister. Manera ta konosí Aruba a konosé hopi kaso di ministernan ku tabata enbolbí ku korupshon i froude den e último añanan. Intenshon di e lei di integridat ta pa skibi presis kiko parlamento por spera di un mandatario pa asina evitá mas kasonan di froude ku polítikonan den futuro.

E moshon di Accion 21 ta remarkabel pa motibu ku e partido ta di opinion ku ministernan mester tin un nivel di edukashon minimal, ku segun opinion di e partido mester ta nivel riba HBO.

Edgard Vrolijk (MEP), komo parlamentario, a bisa den luna di mei di e aña aki, e siguiente tokante e lei di integridat. ‘E lei aki ta di vital importansia den kuadro di transparensia unda un kandidato pa parlamento i su famia ta haña un ‘screening’ basta pisá i sigur e parti di mas importante ta ku komo kandidato pa minister bo mester deklará tur kos ku bo tin i si bin kambio den esaki mester notifiká esaki. E ora pueblo por tin siguransa ku e ‘omkoperij’ nan aki ta pa pasado unda ku tin persona ku a bira Minister pa 8 aña i na final tin kas di luho sin tin hipotek i yate i kantidat di outonan balorá riba 100.000 florin, miéntras esaki hamas por ser hustifiká ku e salario di minister i awe hopi kier bin papia di integridat. Banda di e lei aki mester pèrkurá pa bin ku kamber di integridat pa por kontrolá tur destaho públiko ku ta ser hasi pa por garantia transparensia.’