WILLEMSTAD.- Banko Sentral di Korsou i St.Maarten ta den e proseso pa buska un presidente nobo. 31 di desèmber 2019 tabata e último dia di trabou ofisial di Bob Traa komo presidente interino na e instituto. Manera ta konosi na final di novèmber 2019 Traa a ekspresá na hunta di komisario di e instituto ku pa motibunan personal e no ta bai sigui mas na kabes di Banko Sentral.

Komo ku ta trata di motibunan personal mester duna rèspèt na esei i no bai kuestioná kiko ta e motibunan personal.

Tin un proseso ku a kuminsá mesora pa buska un presidènt nobo, asina Etienne Ys a deklará na EXTRA. Segun e presidente komisario, a start mesora for di momentu ku Traa a anunsiá ku e ke bai. No a sinta warda pa awor numa bai kuminsá. A bai chek e lista di hendenan ku a ya kaba a partisipá i mustra interes pa e puesto i ku a skor bon. Tambe ta analisá tur potensial kandidatonan nobo. Pues e hunta di komisario ta trahando riba búskeda di un presidente nobo pa Banko Sentral.