WILLEMSTAD.- EXTRA a haña diferente reakshon di empleadonan públiko riba e artíkulo ku nos a publiká e siman aki relashoná ku VVU (Vrijwillige Vroegtijdige Uittreding).

Un empleado públiko ku ta papia pa su mes, Arthur Nieuw ta reakshoná riba e konsepto di lei aki, ku ta aktualmente na Parlamento.

Na promé lugá, e ke hasi un korekshon; ámtenarnan ku tin entre di 60 i 64 aña, por opta pa bai ku VVU, irespekto si nan tin 30 aña  den servisio. Banda di e ámtenarnan menshoná, esnan ku a laborá 30 aña  òf mas, irespekto di nan edat, tambe por opta pa bai ku VVU.

Lo kual sr Nieuw ke añadí  n’e artíkulo ta ku enberdat gobièrnu a kuminsá k’e trayekto di VVU, lo kual no tin duda k’e ámtenarnan ku lo bai ku VVU ta masha agradesido na esei.

Esaki komo ku nan por bai ku penshun, bou di kondishonnan favorabel. Sinembargo, e ta un situashon di win-win, komo ku den aña 2022 gobièrnu lo spar

27,6 mion i na 2023, 22,8 mion.

Nieuw ta kere ku ta importante pe pone atenshon na lo siguiente;

Komo ámtenar el a realmente move shelu i tera, pa asina e por a duna klientenan un super bon servisio, ku ménos burokrasia posibel. No tabata fásil, komo e ta dependé di koleganan di Hulanda.

Sinembargo, ku e aktitut adekuá, el a hasi posibel pa realisá su metanan.

Komo ku no tabatin perspektiva p’e, el a disidí di opta pa VVU. Na aña  2020 a puntr’e, den kua luna lo e ke hala kita, i el a respondé den yüni 2020.  Lamentablemente, tur esaki a resultá di ta un farsa, komo ku nos ta den mart 2021 i te ainda e ta laborando komo ámtenar.

Riba 26 di mart último, esnan ku ke bai ku VVU a risibí un mensahe positivo di gobièrnu, afirmando ku e konsepto di lei di VVU ta na Parlamento. Ademas ku e formulario di retiro lo keda mandá pa nan. Tambe nan lo keda informá tokante di retiru. E mensahe aki tabata mas ku bon biní, sinembargo, riba mesun fecha, Minister Konket ta informá ku e VVU lo drenta na vigor na ougùstùs dje aña aki.

“Mi no a spera esaki, komo ku e VVU porfin a yega Parlamento. Es mas, Minister Konket a laga sa, ku e VVU mester a drenta na vigor fo’i 1e di yanüari 2021’.

En todo kaso, a menshoná ku Parlamento pronto lo trata e lei di konsepto di VVU. Pues a spera ku esei lo a sosodé fin di mart.

Hopi alentador tabata un artíkulo, unda Presidente di Parlamento, señora Ana Maria Pauletta a ekspresá, ku mas pronto posibel, e lo pone e konsepto di lei di VVU riba agènda.

E tardansa asina largu realmente ta deskurashá, konsekuentemente e ánimo pa aparesé na boka di trabou, a disparsé por kompleto.

Arthur Nieuw ta kere ku e no ta papia pa e so, sino pa tur e 600 i piku ámtenarnan ku a opta pa bai ku VVU. Spesialmente esnan ku entretantu tin 64 aña. P’esei un apelashon serio na Parlamento i  komishon VVU (ku tin ku regla e retiro), pa no laga burokrasia tin mas influensia.

Un petishon ta, pa laga esnan ku tin 64 aña, pa nan haña prioridat, pa asina porfin nan por bai ku VVU.