Dia 28 di yanüari awor ta dia internashonal di privasidat di data. Den e kuadro aki Juan Vicario propietario di Mark-A-Web Services ta organisá ku Webinair ku diferente oradó i tambe ku posibilidat di hasi pregunta i haña kontesta. Privasidat di data ta un tópiko ku nos ta tende di dje pero den profundidat masha poko. I p'esei Juan mes ta splika i lo bai aun mas amplio den e webinair próksimamente.

Kon ta atendé ku datonan...

Mark-A-Web services a lanta 3 aña pasá dor di orientá riba merkado, desaroyo di merkadeo i web. Den e temporada ei tabatin un desaroyo importante internashonal tumando lugá. Na 2018 e lei internashonal di GPDR a sali. Ta un lei pa protehá datonan personal di hende. Di e tempu ei pa awor Juan a kuminsá hasi investigashonnan riba e desaroyo di e tópikonan spesífiko aki. Esaki a hiba Juan na spesialisá e ora ei riba kon pa atendé ku dato personal i kon garantisá su protekshon. I esaki ta spesífikamente pa kompanianan kon ta atendé ku dato personal di personanan. Juan a splika ku ta atendé spesífikamente ku kompania pa motibu ku leinan di privasidat internashonal i di Kòrsou (Landsverordening bescherming persoons gegeven) ta basa kon kompania òf organisashon legal ta tende ku informashon di personanan. Esei no pa nan trahadó so pero pa públiko en general esta e konsumidó tambe ku ta usa nan servisio, kon ta atendé ku nan datonan personal.

No por kue datonan personal sin mas...

El a sigui splika ku no ta sin mas ta kue dato personal di otro hende i usa. Tur informashon di un persona por keda kategorisá komo dato personal. Un kompania no tin derechi di prosesá, sin tuma e persona su konsentimentu pa usa su dato personal. Tin un lei ku ta garantisá ku kompanianan ta manehá nan datonan personal korektamente i ta duna nan e oportunidat di aksesá nan datonan pa kontrolá si esakinan ta bon. E konsumidó mas aleu  ta haña mas poder di kiko un kompania por hasi òf keda sin hasi ku su datonan.

Lei di protekshon informashon personal...

Na Kòrsou tin e ‘landsverordening bescherming persoons gegeven’. No ta skucha hopi di dje pasobra e lei tin dos parti. E ta papia di derechi di e hende i obligashon di e kompania pero tambe ta duna e identidat  di gobièrnu ku mester kontrolá e ehekushon di e lei aki. I esei ta College Berschermings Persoons gegevens. Aktualmente e no ta instalá ainda, pero ta trahando riba dje. E ta den desaroyo segun Juan. Pronto e kolegio aki lo kuminsá ehekutá nan funshon. Ta importante pa komunidat i kompanianan sa ku e kolegio por kontrolá e lei esta kon kompanianan ta implementá e lei i tambe tin e parti di mehoransa di e lei. Nan por bin ku insentivonan pa mehorá e lei. I kaminda e ta hasié hopi “challenging” i benefisioso pa pueblo, ta ora un kompania faya ku e lei aki,  pueblo por aserka e instansia ei  i nan ta sali pa hasi investigashon na e bienestar di e pueblo. A base di e keho nan ta hiba investigashon. E motibu pa hasi un investigashon por bin di e kolegio mes tambe. Nan tin e derechi di kuminsá un investigashon riba nan mes. I tur esei ta stipulá den e lei aki na Kòrsou.

Duna pèrmit pa usa data...

Dependé den ki konteksto un kompania sea hasiendo merkadeo òf no, ora e tin

‘data base’ di informashon di hende, e mester por garantisá ku e personanan riba e ‘data base’ ei a dun'é pèrmit pa forma e ‘data base’. I e mester wak e aspekto legal di e ‘data base’ ei, esta dikon ta form’é, si ta pa e kompania di por ehèmpel telekomunikashon, e por us’é solamente pa e motibu ku e tin derechi pe. Na momentu ku ke hasi uso di e informashon di e personanan por ehèmpel number telefòn, adrès òf loke sea, mester tin un base legal pa por us’é otro for di e motibu aktual ku bo tin e. I esei ta enserá ku tin e base legal di konsentimentu esta pidi e hende pèrmit pa por usa e informashon pa promové un ke otro kompania. No ta asina asina e kompania por yega i disponé di datonan personal. Kon ku bai bin na momentu ku un dato lèk, e personanan riba e ‘database’ ei nan identidat ta na peliger. Den e ‘database’ tin adrès, number di telefòn, ID number i kualke informashon mas di asta banko. I e por bai na disposishon di otro hende ku ménos bon intenshon i por tin konsekuensia pa e  persona konserní ku a konfia un kompania ku su datonan personal.

Lei for di 2018...

Juan Vicario a bisa ku kompania na Kòrsou tin konosementu di e lei aki. E lei en prinsipio a pasa na 2018 i a sakudí mundu kompleto. Tur kompania sa di leinan internashonal i kompanianan na Kòrsou sin mas tambe sa ku tin e lei di aki. Lástimamente den nos region di Karibe Hulandes i Kòrsou e parti di implementashon nunka a bin ku estudionan i teorianan kon ta mihó manera pa implementá. Tur estudio ku tabatin ta basa kiko e lei ta bisa i kiko tin di tene kuenta kuné. Hopi kompania sa ku nan tin di protehá e datonan personal i p'esei tin e departamento di IT ku ta hasi esei. Pero banda di protekshon mester bin tambe e parti di privasidat. E ta importante pa motibu ku ora tin dato personal di hende, e parti di privasidat ta bai wak kuantu datonan tin, nan ta nesesario pa tin,  kisas pa e funshon di e kompania ei mester di ménos dato personal di e persona i einan e parti di privasidat, e kolaborashon di privasidat i seguridat mester tin ku otro, te ainda no tin estudionan hasi ku por mira ku empresanan ta bon na altura òf no.

Falta investigashon...

No ta bin hopi publikashon dilanti i te kaminda Juan a hasi investigashonnan no akadémiko, el konstatá ku por ehèmpel ora bo bishita un wèpsait mester sali un ‘banner’ ku ta bisa ku e wèpsait ei ta usa ‘cookies’ i e ta kolekta sierto informashon. Pero no ta e ‘banner’ so mester sali. Mester tene kuenta ki tipo di informashon ta kolektando, kiko bo ta bai hasi kuné kon ta bai proses’é i tur eseinan mester keda indiká den e ‘Cookie banner’. E tipo di ehèmpelnan práktiko ei, no ta tur kompania ta implementando manera mester ta. Nan ta saka e ‘cookie banner’ pero sobrá detaye ainda ta falta. E ta difísil pa bisa ku ta tur kompania ta hasié bon òf malu segun Juan, pero e parti di estudio semper ta kai tiki atras den nos komunidat. Paisnan mas desaroyá tin leinan ku ta kubri tur e aspektonan aki. Por ehèmpel na Hulanda tin e E-Privacy i esei ta tur loke tin di aber ku Internèt tin lei stipulá pe. I asta pa ‘Web Cookies’ tin lei. I aki na Kòrsou  e úniko lei ku tin ta e landsverordening di protekshon di datonan personal. Pero e lei no ta bai asina leu ku por ehèmpel ora ta hasi negoshi online kiko tin di tene kuenta kuné. I p'esei mester tuma e referensia di pafó, kiko nan ta hasiendo i kon pa implementá aki. Komo e ‘gap’ ta asina grandi, kompanianan ta puntra nan mes si enbèrdat nan tin di invertí asina hopi den e teknologia òf adelantonan aki òf e ta mantené su mes un tiki mas regional. E parti di privasidat ta relashoná su mes masha bon einan pasobra pa garantisá seguridat ta preferibel atendé ku e tópikonan aki di manera mas stringente posibel ya asina por garantisá públiko ku ta bezig seriamente ku informashon i ku por konfia den e kompania ei. Esei ta algu ku tin espasio pa traha riba dje na Kòrsou.

Webinair dia 28 di yanüari...

Dia 28 di yanüari ta e dia internashonal di privasidat i e dia ei tin e webinair. Juan Vicario a buska oradónan lokal i internashonal pa duna informashon den detaye. Te ainda e ta purbando na haña e parti di lei di Kòrsou aki, ta e ministerio di BP&D ku ta esun enkargá pa pone e kolegio den su futuro i impleme4nte. E ta purbando di haña un hende  splika den detaye kiko e lei ta nifiká. Loke si Juan a haña ta di e islanan BES, nan tambe tin nan lei di protekshon di dato personal i nan si tin un kolegio di protekshon di data. E ta kontentu di por bisa ku nan lo partisipá komo oradó pasobra nan por duna e mihó informashon di kiko por spera di un kolegio ku ta kontrolá un tipo di lei asina aki i kon nan ta den práktika. Tambe lo tin den e webinair un kompania internashonal ku ta spesialisá su mes riba e leinan di privasidat. I nan lo duna un parti importante ku ta di e programa di privasidat ku ta un programa esensial ku por implementá den kompanianan ku ta trese e sinergia di privasidat i seguridat huntu ku otro, i pa e no keda djis na esei tin otro kompania ku ta One Trust pa trese e parti di implementashon dilanti esta kon e leinan aki ta keda implementá lokal tambe.

Webinair pòrnada...

Komo gesto pa informá pueblo Juan a bisa di por subi e Facebook di Mark- A-Web Services i eiriba e dia ei di 9.45 pa 11.30 e webinair ta por ‘stream’ esaki pòrnada. Tambe por sigui riba mark-a-web.com/privacydaywebinair i einan tambe por ‘stream’ e presentashonnan kompletamente pòrnada. Lo tin un seshon di pregunta i kontesta bibu, kaminda partisipantenan por puntra i haña kontesta na mes momentu tambe.

Afiliashon internashonal...

Mark-A-Web services ta duna konseho tambe na empresanan ku ta rekerí esaki. Juan Vicario a splika ku e ta e aktual partner di un di e kompanianan ku ta spesialisá den leinan internashonal ku ta International Association of Privacy Professionals (IAPP) i último añanan el a saka 2 sertifikashon Certified information Privacy Professional (Europe) (CIPP/E) i e otro aktual ta Certified Information Privacy Manager (CIPM. Otro aspekto interesante segun Juan Vicario ta ku e ta partner ofisial  di One Trust ku ta e kompania kon pa implementá e fasilidatnan i outomatisá e prosesonan ku ta bin serka pa kompanianan den region di Karibe.

Tel:+5999519-1045
Email: jgavicario@mark-a-web.com
Website: www.mark-a-web.com